《別帶著陰影去下一段戀愛》

最近同一個女仔朋友傾計，佢話佢依家每日都戰戰兢兢，佢覺得佢唔再相信愛情。事源係佢之前同一個剛分手嘅男仔曖昧，然後有日個男仔嘅前女友出現，兩個人一齊番，淨低我嘅朋友戇居居⋯⋯後來，個男仔同前女友分咗手，又搵番佢，今次仲力追佢。我個朋友唔敢開始，因為佢好怕，好怕前女友有日又出現，佢又會被掉下。

愛情嘅side effect就係佢有可能為你留下無法磨滅嘅陰影。有啲人失戀之後，會格雷上身，跌入萬劫不復嘅深淵，覺得自己唔再相信愛情，無能力再愛人⋯⋯又或者，從此戀愛都會變得疑心好重，成日好怕會再被拋棄。

戀愛本來就係一場賭博，你用青春用愛去落注，希望得到不離不棄嘅愛情。但賭博本來就有輸有贏，輸咗一次兩次甚至幾次，都唔代表你永遠都會輸。贏輸本來就係50：50嘅機會，無必然性。但如果你帶住傷痕陰影去下一場賭博，你用上一次嘅失敗去猜度今次嘅戀人，往往都係將段感情推向失敗。

拋下陰影好難，但如果想要找到幸福，就需要一啲奮不顧身嘅勇氣，即使下一場賭博有可能會輸，但我都會押上全部賭注，全力去爭取一次勝利。唔怕輸嘅人，通常先係賭局中嘅贏家。