前落選港姐做《東張西望》外景主持 獲網民關注兼封新一代《東張》女神

無綫資訊節目《東張西望》採訪唔少社會時事及民生等議題，不過好多時網民都會放錯重點，將重點轉移喺一班靚女主持身上。早前加入做外景主持嘅梁敏巧（Maggie），最近亦開始獲得網民關注，更被封為新一代《東張》女神。

現年26歲嘅梁敏巧，曾就讀於樹仁大學新聞與傳播學系，畢業後成為一名記者。喺2019年，佢覺得人生苦悶，好想做一啲嘢去衝擊一下，於是佢就參選香港小姐。Maggie落選後隨即加入無綫，雖然佢嘅演出機會唔多，不過喺2020年成為兒童節目《Think Big天地》主持。《Think Big天地》結束後，Maggie立即被安排參與《東張西望》外景工作。出外景已經幾個月嘅Maggie，最近終於被網民關注，紛紛留言大讚佢樣靚同身材好好，例如「都幾索喎 maggie Leung」、「身材好，樣子甜美，正。」、「後生又靚女 做主持真係會學到好多野」、「你做得好好吖thinking女神」、「支持Maggie姐姐，做東張西望外景主持」及「​​東張女神。 很鍾意你的主持。」等等。

喺接受傳媒訪問時， 做慣廠景嘅Maggie就話加入《東張西望》初期有少少唔慣，原因係外景嘅執生能力要再高啲，啲嘢每分每秒都會唔同，所以去外景鍛煉係一件好事。老細俾任務佢哋去做，而Maggie就要同幕後一齊去諗，佢認為諗嘅過程係一件好有挑戰性同好好玩嘅事，如果做到嘅話會好有成功感。另外，Maggie仲話試過表現不佳被監製照肺，指明唔滿意佢啲VO，之後佢就日日大聲練習咬字及抑揚頓挫等等，經過多番努力，而家幕後人員覺得佢進步咗。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！