劉鑾雄開記招交代與呂麗君關係 答埋娛圈舊愛同「春卷乒乓波」傳聞

早前網上流傳片段拍到富商劉鑾雄（大劉）現身旗下商場，而身旁女子正是舊愛呂麗君，令人聯想到二人關係係咪破冰。大劉事後發聲明之餘，更於今日召開記者會交代。

今早嘅記者會前，現場人員表示不得拍片，只可以錄音同影相，並要記者交出手機。而大劉嘅枱面上就有唔少消毒用品及一疊白毛巾。

大劉話自己最唔鍾意睇到有關佢同呂麗君關係嘅傳聞，有記者要求大劉對呂的為人評價，大劉就話「唔方便comment」，但隨後就話「如果講，真係講七七四十九日都講唔完」。大劉嘅聲明提到二人見面係因為「呂小姐」有困難有事相求，但今日記者會上大劉拒絕交代「呂小姐」有咩困難，又著記者向財經記者了解。大劉強調係因為唔想有難堪嘅事出現而影響細路先至幫手，又暗示有人「有啲天生性格到死嗰日都唔會改，唯有黯然接受」。

記者會上大劉大方回應唔少問題，就連以往喺娛圈結識嘅女友都提到。佢承認過去有唔少女友，來自娛圈嘅只有1％，又指有前度「結婚兩三年，一年都同我攞幾個鱷魚皮、鑽石手袋」。大劉連關於佢嘅傳聞都回應，包括「春卷、乒乓波、網球」同「摑完人再拎張支票掟埋塊面」，佢話「乜嘢都有人作」，又話自己「隨身唔袋支票」。

大劉亦交代財產分配，澄清係太太陳凱韻(甘比）同埋佢地3個仔女以外，大劉同呂麗君及前妻寶詠琴所生子女﹐都會獲得佢嘅財產。

早前大劉喺片段流傳後發聲明澄清，同「呂小姐」2014年分手後不相往來，與「呂小姐」只係小朋友父母親嘅關係。大劉又解釋早前「呂小姐」有困難有事相求，大劉為免子女受影響而與「呂小姐」達成商業協議，當日同喺皇室堡寫字樓簽署相關文件後，喺冇相約之下一齊搭lift，而唔係同「呂小姐」行街，又強調與「呂小姐」已多年冇見面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！