《千其唔好諗住用小朋友去箍住個男人》

女人為咗要留住男人個心，有啲人選擇用食物，但有啲人會選擇為佢生個小朋友。「男人有咗小朋友就定性㗎啦」、「男人有咗小朋友就走唔甩」，呢個唔係肥皂劇，係真實發生。

電影《單身動物園》有一幕我好難忘，戲入面有間飯店畀單身人士入去住，佢哋要喺入面搵另一半，成功配對同生活一段時間先可以重返社會得到自由。而戲中嘅經理同一對啱啱配對成功嘅夫妻講：「如果你地有咩解決唔到，就聯絡我，我會派一個小朋友畀你。通常有咗小朋友之後，好多問題都會解決。」

而現實世界入面，其實都有好多咁樣嘅人。

好多夫妻覺得感情轉淡，或者老公唔定性，就會諗不如生個小朋友啦。我亦有聽過有女仔因為男朋友遲遲未肯同佢結婚，就索性偷偷使橫手，希望可以搞大個肚令個男仔一定要娶佢。

不過小朋友唔係感情醫生，多咗個小朋友唔代表你哋嘅問題會解決，只係代表你地之間會出現更急切嘅問題要解決，要掩蓋咗你地本身已存在嘅問題。再者，一個唔愛你只係為責任而同你一齊嘅男人，即使你為佢生幾多個小朋友，佢都可以有日轉身就走，而到時你就會變成一個拖住兩個細路嘅單親媽媽，唔好害咗自己，害咗小朋友。一個男人要用小朋友用責任先留低住嘅只係個人，唔係個心。