反起跑線聯盟2︳58歲劉倩怡罕有現身演嫲嫲 自爆近期生蛇「半邊面像燒傷」

曾於電視台工作嘅電台主持劉倩怡，喺前晚ViuTV劇《反起跑線聯盟2》驚喜客串以貴婦打扮出場，同張松枝飾演林家熙(Locker)劇中媽媽，亦即係Yumi B嘅嫲嫲。不過劉倩怡喺劇集出街當日透露近期身體抱恙生蛇！劉倩怡表示十日前同張崇德、劉美娟夫婦食飯後就出現癥狀，除咗睇醫生同做節目就冇再露面，「因為我半邊面像燒傷了一樣（俗稱叫生蛇），10日的今天，還有約四分一面是焦了未退的」。

劉倩怡90年代起於港台主持節目，後加入TVB做主持及拍劇。至2001年劉倩怡轉職幕後，為基督教媒體擔任製作人，後來再次重返咪前，為港台主持節目。

劉倩怡1995年與鄭子誠合作主持《今夜真情》而擦出愛火花，後來亦引薦子誠加入TVB。子誠曾透露同劉倩怡性格大不同，自己比較慢同優柔寡斷，但倩怡就好快好果斷。鄭子誠同劉倩怡於2003年結婚，多年來享受二人世界，即使結婚20年鄭子誠對太太仍然相當浪漫，生日同紀念日都會寫卡俾太太表達愛意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！