受困港女被消防員救出興奮表情片被瘋傳 Kylie C鄭杞瑤出IG Story否認為當事人

噚晚（7日）入夜後香港發生百年一遇嘅暴雨，多區喺黑雨下出現嚴重水浸，多處都因水浸有人被困。HOY TV拍攝一名受困年輕女子被消防員抱起救出時，全程露出燦爛笑容及滿足嘅神情，表情極為搶鏡，結果影片喺網絡上瘋傳。

呢一幕引起網民熱烈留言討論，例如「早知比心機健身做消防」、「受災嘅人之中佢最開心⋯⋯真係唔抵得呀」、「個樣好滿足」及「人生幾可有機會畀消防哥哥咁樣攬住⋯⋯」等等。同時亦有網民覺得片中女子好似KOL Kylie C（鄭杞瑤）。不過去到今日下午，Kylie C喺IG出Story否認：「多謝大家關心，我一直在家休息，沒有被消防員哥哥救出喔～大家記得注意安全。」

26歲嘅Kylie C擁有36E傲人身材，曾於英國修適士大學修讀犯罪心理學，畢業後返回香港曾任行為治療師。喺2021年，Kylie C參加《2021亞洲模特盛典香港賽區暨ACE演藝大獎》奪得演藝亞軍及 「Face of Hong Kong」模特兒冠軍，去到上年，佢憑ViuTV戀愛真人騷《戀愛Staycation》人氣大增，之後再以TripleMay之名參加ViuTV另類選美節目《尾二一屆口罩小姐選舉》，至今IG已有超過17萬名追蹤者。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！