台慶劇《誇世代》首播 觀眾反應如何?
台慶劇《誇世代》齋睇劇名都知劇集誇張,尋晚首播唔知班觀眾有咩反應?
卡士勁
除咗搵嚟歐陽震華、陳豪、田蕊妮、李佳芯等領銜主演外,仲搵一班大星做演出及客串,例如汪阿姐、鍾景輝、薛家燕、吳岱融等超過70位演員。
陳豪好型
陳豪喺《使徒行者2》造型被彈又老又殘,估唔到換一換個髮型大騷肌肉,觀眾即刻大讚好型好有男人味,好似《天與地》中嘅黑仔。
飛機嗰幕好流
歐陽震華飛去比利時嗰陣,飛機遇上氣流被拋至半空,一班觀眾都覺得嗰幕好流︰有咩可能飛機會突然急速墜下,而其他乘客好似冇咩反應咁?
開Party嗰幕好《華爾街狼人》Feel
劇中陳豪老闆同一班同事開咗個驚喜派對慶祝生意愈來愈好,有眼利網民發現呢幕同《華爾街狼人》好似。
陳偉琪色誘陳豪尺度大
飾演陳豪秘書嘅「無綫咪神」陳偉琪色誘陳豪,瞓係辦公桌上拎起香檳倒係身上大騷34E身材,估唔到8:30黃金時段可以尺度咁大。
唔想見到坤哥
劇中歐陽震華飛機失事同吳業坤靈魂交換,但一班觀眾見到坤哥即刻話唔想睇。但其實坤哥個樣喺第一集只係出咗兩幕,大多數時間都係歐陽震華做返,唔駛咁大反應啩。