台灣「#metoo」事件｜肥媽自爆曾被人摸屁股 警惕女仔要保護自己

台灣「#metoo」事件最近已經燒到演藝圈，藝人許傑輝、宥勝、黃子佼被指控性騷擾後形象盡毀，最近連徐乃麟亦疑似牽涉在內，不過佢發聲明否認。肥媽（Maria Cordero）噚日（19日）接受傳媒訪問時亦指自己曾被打屁股，而佢更即時作出反應保護自己。

肥媽喺接受訪問時就話有唔少年輕女仔問佢點樣應對不軌企圖嘅導演或者前輩，佢就話佢有教女仔，以前嘅電影及電視圈發展未係咁健全，而家可以利用高科技，用電話錄音，喺未發生事就可以錄音告佢。再加上而家透明度好高，女仔唔需要驚，有啲咩事都可以出聲。

至於被問到台灣「#metoo」事件係唔係影響娛樂圈形象，肥媽就話以前冇咁多呢啲嘢，甄珍、林鳳、林黛、何莉莉都好健康。而家成行咁樣講，圈外人會覺得呢行好亂，其實寫字樓一樣咁亂。做女仔要好好保護自己，如果條件唔係咁好就唔好入行，唔係單靠做呢啲嘢就掂。

之後，肥媽被問到係唔係「鹹豬手」唔敢埋身，佢就話當年佢喺酒廊唱歌嘅時候，Bobby Brown同佢爸爸都有去睇，Bobby Brown試過喺佢行過打佢屁股，之後肥媽就擰轉身摑咗佢一巴。雖然當時肥媽唔知佢係有心定冇心，不過就係要俾佢自己會唔係呢種人，同埋人一定要保護自己，一定要出聲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！