雅虎香港新聞 叱咤2023總結︳陳蕾張敬軒贏我最喜愛的男女歌手 姜濤連續4年贏我最喜愛的歌曲
「2023年度叱咤樂壇流行榜頒獎典禮」元旦夜舉行，賽果爆出不少冷門。由樂迷投選嘅我最喜愛的男歌手，事前受網民力捧嘅尹光爆冷輸俾張敬軒，軒公事隔十年再獲呢個大獎。張敬軒得獎後公開多謝鏡粉，而且要衷心多謝香港，「因為我作為一個廣州人，喺香港打拼左23年，好多謝大家由接納我到相信我。今晚呢個獎項，我覺得係呢個城市俾我嘅一個blessing，亦都係一個信任。2024年我會帶着呢個獎項去報答呢個城市嘅人。」
另一爆冷賽果係事前備受睇好首奪女歌手金獎嘅Gin Lee李幸倪，被陳蕾「反cup」屈居銀獎。而陳蕾除咗首奪女金之外，同時首次拎走我最喜愛的女歌手，加上叱咤十大歌曲獎同唱作人銀獎，成為今晚大贏家。值得一提係，今晚我最喜愛的男、女歌手都係由來自廣州嘅歌手贏得。
而MIRROR今晚只係得到樂迷投選嘅我最喜愛的組合大獎。MIRROR去年只有2首中文派台團歌，隊長Lokman都話去年團員有好多個人發展，「音樂組合係爭少少……2023年好多個我，好少我地」，承諾今年會更多團隊作品。反觀MIRROR成員今晚成績不俗，陳卓賢得到唱作人及男歌手銅獎，而姜濤除咗得到「專業推介叱咤十大」之外，由現場觀眾投選嘅我最喜愛的歌曲大獎中，《濤》更以超過5千票勝出，力壓另一人氣隊友盧瀚霆嘅MONEY。不過姜濤得獎後本來以為要演唱歌曲，仲想搵埋ERROR嘅肥仔一齊上台表演，但最後懷疑大會因為節目超時，司儀森美打圓場完show，令呢次「師徒合作」未能成事。
＝＝＝＝＝＝＝＝＝＝＝
賽果以外，全晚都有不少亮點同笑點。造型最爆嘅應該係Tyson Yoshi嘅「低胸裝」，「事業線」力壓一眾女星之外，就連MC之一阿正都要調侃。而Edan更將阿正俾佢粒墨擺喺Tyson心口。
MC張天賦以《世一》得到「叱咤十大」後被指黑面，唔知係咪佢上網睇到報導，到佢得到男歌手銀獎後就解釋話頭先唱《世一》之前食緊喉糖，唔知道自己得獎於是要咬碎粒糖，暗示自己冇黑面。
早前傳出有機會缺席嘅MIRROR就全員出席，至於壓軸出場嘅係79歲嘅尹光。
開場演出請到《白日之下》童星黃梓樂、入圍角逐金馬影后嘅鍾雪瑩以及胡楓做表演嘉賓。修哥仲唱出契仔黎明嘅《哪有一天不想你》及張學友《愛是永恆》。
艾粒中場talk show調侃歌手用英文做歌名，想搵Nancy Kwai講出自己歌名時，Nancy Kwai卻不在觀眾席。
被認為係MIRROR成員Ian陳卓賢FANS嘅房屋局常任秘書長兼房屋署署長羅淑佩，今晚當然到場支持，原來佢仲坐喺MIRROR附近，相信署長應該睇得好開心。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
