叱咤2023︳炎明熹傳打入叱咤十大現身ViuTV？張敬軒《隱形遊樂場》穩奪至尊歌

「叱咤樂壇流行榜頒獎典禮2023」於元旦舉行，以計算播放率嘅多個大獎理應截數。早前我地分析過叱咤樂壇男歌手同組合大獎嘅情況，而今日有傳媒率先披露向來最難估計嘅「專業推介 叱咤十大」歌曲獎。

以商台全年播放率最高十首歌所頒發嘅「叱咤十大」之所以難估，因為商台內部計算數字同樂迷監聽節目所計嘅經常有出入。而今日爆出嘅「叱咤十大」名單之中，最驚喜係TVB力捧嘅炎明熹有望憑Little Magic首度奪得歌曲獎。由於頒獎禮將於ViuTV轉播，而得獎歌手又會上台演唱，假如Gigi獲得「叱咤十大」，即係會首度喺ViuTV獻唱。

而全年最高播放率嘅「至尊歌曲大獎」，相信會由張敬軒嘅《隱形遊樂場》奪得。軒公今年唯一派《隱》上台，並製作多個編曲版本，甚至到年尾都出多一個新版谷播放率，加上係全年唯一上榜12周嘅單曲，大獎似乎十拿九穩。對上一次張敬軒得到「至尊歌曲大獎」，已經係2007年嘅《酷愛》。

至於其他得獎歌曲估計有係呢幾首歌曲之爭，包括RubberBand《不如散步》、Gin Lee《Dum Dum》、陳蕾的《伸縮自如的愛》、馮允謙《收到收到》、林家謙《流離者的海》。去年因為演繹十大歌《鏡中鏡》而備受討論嘅姜濤，今年有機會《濤》再次打入十大。而Lolly Talk及陳健安估計會分別以《一把火》及《仍然是那個少年》首奪「叱咤十大」。

需要留意嘅係，叱咤向來有個不成文規定，假如同一歌手有2首歌播放率位列十大，就只會有其中一首得獎。因此各歌手得獎歌曲或有不同，但人選大致如上。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！