叱咤2023｜杜汶澤FB發長文談姜濤「壓力肥」應放假沉澱：每個偶像一紅就會好大壓力

《2023年度叱咤樂壇流行榜頒獎典禮》喺元旦日晚已經圓滿舉行，作為最矚目及最令樂迷期待嘅樂壇成績表，當然吸引唔少人關注，當中已經移居台灣嘅藝人杜汶澤，而佢就特別關心MIRROR成員姜濤嘅狀況，仲喺今日（2日）喺Facebook發長文討論姜濤。

今日，杜汶澤喺Facebook上載姜濤噚晚喺《2023年度叱咤樂壇流行榜頒獎典禮》演出嘅照片，並指姜濤「佢真係肥」，不過杜汶澤就認為偶像一紅就會有壓力，所以佢認為姜濤嘅肥可能係「壓力肥」，佢應該要放假沉澱一下，思考一下人生，咁佢將來就可以走更遠嘅路。同時杜汶澤亦指盲目攻擊同瘋狂保護姜濤係對佢冇好處，對佢哋嘅人生亦冇營養。另外，佢仲話自己幾年前曾經喺電視台做嘢時見到姜濤，當時嘅佢係一位好有禮貌嘅小朋友同埋好可愛，不過而家見唔到佢呢種笑容：

「唔通我仲會相信，自己講幾句說話，就會改變到個世界咩？敢言？能當飯吃嗎？（北京腔）其實講乜，都會俾人話抽水，又話咩刷存在感乜乜77，所以真係要出於真心，至唔會怕聽呢啲無謂攻擊。我想講吓姜濤。我當然知道佢啲fans好保護佢，所以任何人攻擊佢都會干犯鏡安法，一世被追捕，我老嘞！只係想安享晚年，所以會好小心講。

我覺得佢應該放假。一年？至少半年。做乜？無呀，減下肥，打下波，去外國生活下，唔上跳舞堂唔學唱歌，可以學下其他嘢吖咁後生。不過唔建議去美國XXX乜嘢都加芝士加煙肉分分鐘返嚟仲肥。佢真係肥。我無資格笑人肥我自己都肥到隻豬咁不過我比較傳統，覺得偶像唔應該肥，自己都唔會開心啦！我覺得佢呢種肥可能係「壓力肥」，所以我關心嘅係佢嘅心理。係呀，我好多事咖！大家都係人，如果唔係太蝕底嘅，我多數都會關心吓。

好多年前我有次響電視台做嘢，響後台見到佢，佢係一個好有禮貌嘅小朋友，好可愛。

但係而家見唔到佢呢種笑容。其實每個偶像一紅就會好大壓力，呢個係定律。好似以前謝霆鋒細個嗰陣仲癲過龍心啦！撞到啲車爛X晒，人就係咁㗎啦，唔適應吖嘛！陳冠希咪又係咁，亂X河馬，而家同個女幾溫馨呀。其實盲目攻擊佢同埋瘋狂保護佢唔單止對佢都冇好處，對你哋自己嘅人生其實都冇乜營養吖。

至於行內人，10個有9個都唔會講真說話，啲老鬼見到你咪擦鞋囉，對外猛讚你搏你啲fans都鍾意佢呀嘛，我哋以前叫「偷fan屎」，對內又唔敢得罪你。夥計就更加唔會出聲啦，好似劉德華咁，成日著條吊腳褲鬼咁核突，圍住佢嗰啲擦鞋仔個個都話靚呀靚呀，咁佢咪信囉！邊個夠膽講真說話㗎？死咗啦。所以佢啲同事一定同佢講：「你已經瘦咗好多啦！加油啊！」細侄你記住，邊個咁同你講邊個就係害X你嗰個。

我就無嘢搏啦我大把水咁啱行過見到，覺得佢好慘啫！所以你哋如果真係錫佢就應該勸佢休息下，俾自己一個沉澱嘅機會，放鬆嘅空間，思考下人生，將來可以走更遠嘅路，而且一定會有進步！破釜沉舟層次一定更加高！一年半載返嚟點會俾人搶咗個位啊？香港都冇人！至於攻擊佢嗰啲我又好明喎，呢個世界除咗任賢齊，係明星都有人鬧咖啦多定少啫。再加上社會氣氛咁實同你死過啦！

2024年，一切都係新的開始，希望所有人都可以開開心心，乜都係過眼雲煙⋯⋯Just relax MAN !

p.s. 睇完唔忿巢X我嗰啲嘥氣啦我已經有就住啦！我係唔會理你，你當阿叔新嚟咖你自己嬲飽佢啦！」

呢個PO一出，唔少網民紛紛留言表示認同杜汶澤嘅睇法，例如「講得好！非常正確」、「就個個都識，意見就唔係個個都比，你絕對係一個好大哥，你走咗去台灣，絕對係香港演藝界一大損失」、「語重心長呀 盲撐真係會害死佢」、「腳傷後就開始肥 ，加埋壓力..我覺得佢有食藥所致」、「認同，我唔介意姜b圓潤，但希望佢健康開心」、「絕對同意阿杜生所講。。。而且，如果撇開因為係港產因而要撐嘅因素，外邊大把偶像團俾港產嘅跳唱更精彩更高水準，捧場客要真金白銀支持，點解唔追啲更加優秀㗎呢」及「杜生真係講得好岩，睇電視都睇到姜根本好唔開心，唔想每十年有明星自殺嗰個係佢，應該比佢放長假休息下！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！