同門六年鬥足六年許廷鏗寸爆宿敵鄭俊弘

東方新地

更新日期： 2017年12月20日上午6:48

今年四月鄭俊弘(Fred)被爆移情別戀何雁詩，狠撇圈外未婚妻Beebs，搞到形象破產入埋雪櫃，解凍都未夠一個月，日前又因為放狗用倒釘帶激怒全體動物保護團體及一眾狗奴，呢個彈仲唔係有排拆？鄭俊弘呢頭出事，前星夢同事現華納一哥許廷鏗即在社交網絡上載三色拆彈錶照，真係晒錶咁簡單？同門六年、爭寵鬥足六年，宿敵又惹事生非，仲唔抽水等幾時？

撰文：東方新地

圖片來源：新傳媒圖片庫、何雁詩&鄭俊弘Instagram

許廷鏗明寸宿敵鄭俊弘

先係被揭一腳踏兩船，棄未婚妻得罪全港女人、再為咗一條釘帶激嬲全港狗奴，全盛時期嘅鄭俊弘到底可以得失幾多人？上周中，一則鄭俊弘及女友何雁詩放狗放到要用釘帶、又疑似有棄養意願的報道出街後，剛剛逃離雪櫃的鄭俊弘再次成為負面新聞嘅男主角。原來除了得罪女人同狗奴，鄭俊弘更是昔日星夢同門許廷鏗的眼中釘。

被拍到放狗時為養足四年之拉布拉多犬Riely帶上釘帶防搶繩，有動保組織表示用釘帶教狗極殘忍，在某些國家及地區，更是違法行為。

鄭俊弘出事後，許廷鏗po相又配上留言「拆彈專家錶」，表面上晒新錶，實情係心涼宿敵又出事、舊唱片公司又要煩惱點拆彈。

為虐狗疑雲解話

其實鄭俊弘今年為撻著何雁詩，而搞到大話連篇又抛棄拍拖三年未婚妻，鄭俊弘已經搞到形象跌落谷底，今次再惹虐狗疑雲，二人事後嗱嗱聲發表英文千字文申明自己有幾愛Reily。

何雁詩首先出聲，自稱狗癡，絕對唔會棄養，再表示出面滿城風雨，Reily此刻在家過得不知幾舒服。

爭寵不成嬲到離巢

《超級巨聲》出身、理所當然要加入電視台姊妹唱片公司星煥(星夢前身)，自己人捧自己人、唱埋自家主題曲再橫掃自己台勁歌金曲獎本來是常識。不過出道六年、效力星夢六年，許廷鏗卻於今年五月失驚無神轉投華納旗下，據知情人士透露，無論長線積怨定短線導火線，都係因為鄭俊弘：「Alfred(許廷鏗)一直以嚟負面新聞少啲、啲歌又hit啲，一直覺得自己應該係星夢一哥，但近年公司資源擺明放晒喺Fred度，所以佢條氣一直唔順。直到今年四月鄭俊弘一腳踏兩船仲連老闆都呃埋一份，有人覺得眼中釘今次實走唔甩，點知話雪又唔雪得晒，Alfred趁住五月約滿，索性走人囉！」頂住條氣離巢，今次宿敵搞出大頭佛當日，即晒三色拆彈錶呢個世界邊有咁多巧合？