吳雨霏罕有提及細女患先天性心臟問題 好友網民紛紛留言打氣

歌手吳雨霏（Kary）喺2015年與初戀男友「網球王子」洪立熙結婚，婚後淡出幕前，現時育有3名子女，一家五口幸福美滿。Kary喺前日（31日）趁住係2023年嘅最後一日，喺社交網站上載多張照片及寫下2023嘅總結，期間罕有提及細女Nora嘅先天性心臟問題。

吳雨霏前日趁住2023年嘅最後一日，喺IG上載多張照片，並透露自己正在發高燒，並罕有提及只有1歲半嘅細女Nora嘅先天性心臟問題：「This is my 2023。當我打緊呢段字的時候，我正在床上發高燒發到瘟瘟沌沌，特別感性。在回想2023這個crazy year，發現我用了大半人生才領悟到「感恩」這個課題，以前從來都只有看到最壞或更壞，或一直埋怨，現在終於慢慢學會在無論任何情況，都可以選擇看到好多值得感恩的事情。感恩bb生病期間找到有好醫生醫治；感恩有一班天使朋友為我們祈禱；感恩一個好老公和家人做我最強後盾，現在bb行得走得玩得。是三個仔女之中最多energy的一個。當bb情況慢慢穩定後，我給自己一個簡單目標，就是要幫有需要嘅人，坦白說，有好多時候都不知道怎樣幫，但我同自己講不要想太多，做到就做，盡力而為，每星期都盡量騰空一些時間幫助有需要的學生做功課。或同年青人一起上課，不老土，事實收穫比付出更多，這是最大的歡樂。期待2024的一切，大家繼續努力，繼續善良 Be Kind，I love you all」。

呢個PO一出，唔少網民都紛紛留言支持及祝福佢，例如「感受到呢段文字嘅背後 愛是光 祝願你 所有事 越來越美好」、「早日康復！2024年祝女神繼續幸福快樂 一家大細都身體健康」及「仍確信世界美好的 擁抱身邊迷失的 由奇蹟創造奇蹟 Happy New Year Look forward to seeing you on the stage again」等等。另外，好有鄧麗欣、區文詩及周勵淇等好友亦有留言或留下心心為佢打氣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！