【呀～～～】唔想讀錯字 請教《粵音韻彙》啦

尋日4點鐘阿sir記者會，2位克盡己任嘅警方代表，唔覺意將「草菅人命」個「菅」（音︰奸）讀成「管」，同埋將「侮辱國旗」讀成「悔」辱國旗。 嗱，咁証明佢地都唔係跟稿讀（有稿唔俾讀音即係玩上頭啦？），出自真心又反映到個腦都有2滴墨水。口快讀錯邊個未試過啫，點做嘢係咪要你教？以前睇電視嘅經典場面，阿sir了解完街頭少年嘅狀況（簡稱𢭃）之後，都會以嚴父慈母混合體嘅口吻講句「下次唔好啦」。所以小編都介紹個神器俾阿sir見記者前用，「下次唔好啦」。呢個由中文大學（暴大）開發嘅《粵音韻彙》網頁版，係取材自堪稱廣東話讀音天書、 黃錫凌先生編著嘅《粵音韻彙》。網頁1996年設立，1998年更新過，基本上由讀書時用佢到而家讀面書時用佢，都係同一個版面。（網頁仲建議用戶以Netscape瀏覽器觀看以確保版面效果……Netscape！）

之但係呢個page的確好駛，打個字入去就搵到讀音連聲調，唔識拼音又可以播出嚟。又或者掉返轉，打個拼音，就會列出同音漢字，呢個功能我諗對填詞人、rapper同阮兆祥最有用。唯一要挑剔就係，有部份字嘅配詞讀音冇列明，例如搜索個「索」係讀sok3定saak、調查個「調」係diu6（冇第個意思）定tiu4？係冇指示嘅。不過個「菅」字同「侮」字都係得一個音嘅，一定唔怕錯！Thank you sir!《粵音韻彙》網頁版