周海媚逝世︳初戀男友呂良偉形容舊愛當年「好清純好乖」曾「秘婚」原來冇註冊

周海媚喺北京因病去世，終年57歲。周海媚落選港姐後加入TVB，出道不久就獲安排拍劇，更因為拍劇而撻着當時一線小生呂良偉。後來即使分手，二人仍保持良好關係。

事隔多年後，呂良偉接受《志雲飯局》訪問，被主持陳志雲問及當年與周海媚嘅一段情。呂良偉憶述1986年拍《小島風雲》時認識海味，後來發展成情侶。呂良偉受訪時提起對海味嘅第一印象，覺得佢「好清純、好乖、好斯文」。呂良偉又透露自己係周海媚初戀男友，因此好著緊，對女友十分保護。當年呂良偉住清水灣，周海媚住屯門，呂會等女友收工，再揸車從清水灣電視城送女友返屋企，自己先再返清水灣。呂良偉形容周海媚性格幾倔強，但有時會小鳥依人。

呂良偉同周海媚拍拖2年後決定飛去美國「秘婚」，但當時同行嘅美國朋友為佢地辦理完登記手續就話搞掂，結果呂良偉同周海媚冇正式簽字註冊結婚。多年後呂良偉同鄺美雲籌備婚禮時，呂搵香港律師辦理同周海媚嘅「離婚」手續先知，原來當年冇註冊。

被問起分手原因，呂良偉話後來慢慢feel到大家唔夾，仲成日嘈交。「我覺得兩個人一齊生活，有冇需要咁辛苦呢？你咁後生又咁靚女，不如畀你一個機會，早啲分手，畀你搵另一個白馬王子」。呂認為二人分手後關係仍好。當時有傳二人分手同黎明有關，兩男更大打出手，但呂良偉喺節目度否認有咁嘅事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！