周海媚逝世︳爸爸代報名選港姐 自稱「傻更更入行」同黃日華溫兆倫情同兄妹

前日逝世嘅周海媚，1985年參選港姐時雖然未取得名次，但被睇中加入TVB，好快就成為上位花旦。演藝之路由港姐展開，但原來周海媚當日無意參加，係被爸爸整蠱幫佢報名，誤打誤撞成為家傳戶曉嘅女星。

周海媚早年接受資深傳媒人汪曼玲訪問時提到，18歲時被爸爸幫佢同家姐報名選港姐，報名要附上嘅照片都係同家姐嘅合照。海味憶述當時仲讀緊書，甚至係準備考會考，所以冇理到爸爸做乜，直至TVB打電話叫佢去面試，都仲以為係被整蠱，後來先知係真。而周爸爸原來唔係貪玩先幫個女報名選港姐，周海媚話因為細個好男仔頭，覺得個女要學做一個淑女，而且18歲要有特別經歷，於是就幫海味報名。入圍後，海味又真係要著高跟鞋訓練儀態，腳都腫埋。

海味自言入行係「傻人有傻福」，因為當初冇話特登要做藝人。選完港姐之後，周海媚只係上咗3個月藝員訓練班就拍劇，開頭甚至唔知鏡頭喺邊，數住第幾句對白到自己就行出嚟，但係因為TVB力捧，拍過幾套劇就成為女主角。周海媚同曾經合作拍《義不容情》嘅黃日華及溫兆倫成為好友，更食餐飯當結拜，海味仲會叫黃日華同溫兆倫做「阿哥」。而早年海味喺內地開始發展時，就曾經向一早北上嘅溫兆倫請教。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！