和歌山11個必到行程

早前杜如風喺和歌山「赤裸」浸浴，又見貓車長又切吞拿魚，攪到身邊唔少朋友都心癢癢想去走一趟。近日CNN就介紹咗11個和歌山必玩行程，當中唔少跟杜小姐一樣，橫掂從大阪過黎只需70分鐘車程，跟住黎玩實無死。

1.「最美味」拉麵
唔係得個講字，自從和歌山「井出商店」被日本美食節目選為「日本最美味」之後，果度就成為拉麵愛好者嘅朝聖地。招牌醬油豚骨拉麵，湯底由豬骨同醬油熬成，濃而不化，麵條以細麵為主，很能掛湯，配上水煮蛋及壓壽司，是和歌山獨有的拉麵食法，小心食上癮。

相片來源：Richard, enjoy my life! @flickr

2. 切吞拿魚表演
杜如風都有去嘅黑潮市場(Kuroshio-Ichiba Market)，每日都有三段時間切吞拿魚表演，分別係上午11點，中午12點30分及下午3點。唔好以為好似街市劏魚咁，日本人對劏吞拿魚有一套技巧，非常細膩又有智慧。

相片來源： sevenaunt @flickr

3. 熊野古道
位於和歌山南部嘅熊野古道(Kumano Kodo)，係日本非常有名嘅郊野路徑，有七條唔通難度嘅路線，途徑日本三大聖地，包括︰本宮大社、那智大社及速玉大社，因此，熊野古道亦係其中一條最古老嘅朝聖路線。

相片來源：Benjyamin @flickr

4. 真正嘅溫泉蛋
日本有名溫泉多的是，和歌山田邊市嘅湯の峰温泉，就係世界唯一一個由聯合國教科文組織確認嘅世界遺產。呢到除咗有溫泉蛋，仲有用溫泉水煮嘅蔬菜，當地居民仲會買溫泉水返屋企煮飯，1日元買到1公升。

相片來源：David Z. @flickr

5. 露天溫泉
和歌山野外露天溫泉特別多，好似野中溫泉、崎の湯等，面對無盡海景，比室內的溫泉更有風味。

6. 入住寺廟
越來越多遊客去到和歌山，都會想試下六根清靜嘅和尚生活，入住寺廟成為最新潮流。市內有52間寺廟為無論有冇宗教信仰嘅遊客，提供住宿、冥想、素食等服務。

7. 那智火祭
有1,700年歷史嘅那智火祭，每年七月舉行被認為係日本最神聖嘅節日之一。由幾十位青年男子輪流托住12把約重50公斤嘅火炬，上去133米高嘅那智大社，沿途歡呼吶喊，以謝神恩。

8. 火車站貓站長
將和歌山紀之川市嘅貴志火車站(Kishi station)起死回生嘅貓站長「阿玉」，去年過世，如今就讓佢徒弟「二玉」，接任做站長，每年都吸引到好多遊客特意前來朝拜下。

9. 和歌山城最佳觀賞點
和歌山城係一座標誌性嘅傳統日式城堡，被譽為全市最佳觀賞點，一覽和歌山市全景。
相片來源：Wei Hao Tsai @flickr

10. 盛產水果
和歌山有水果王國之稱，盛產士多啤梨、葡萄、柿子等，而橘子更加係世界最好咁話，酸甜度完美平衡，皮薄多汁，諗下都流晒口水，記得前往果園摘下橘子啦。

11. 站立式竹筏
和歌山嘅北山村(Kitayama village)有一種好特別嘅漂流方式，就喺用站立式嘅竹筏去漂流。有600年歷史嘅站立式竹筏，幾隻竹筏前後連接一齊，大家企喺上面，順流而下。每年5月到9月，都喺最佳嘅漂流季節。