【哪有車】冇車揸考牌為乜？港女學車係咩心態？

香港嘅生活環境唔同外國，地方細交通又方便，即使你有車牌又有車，最終搭車嘅機會都一定多過揸車。所以好多香港人，尤其係港女，可能成世人都冇諗過要學車，因為就算考到牌都未必有車揸，咁仲為乜要嘥錢去學？

再加上港女天生唔需要Gadget，唔會好似男人咁重視「第二頭家」，自然唔會覺得學車有幾咁重要。「你估以前阿爸阿媽嗰個年代咩，一出嚟做嘢就要去學車考牌，話要有一技傍身喎。」係嘅，今時今日大學生一街都係，仲邊會有港女讀完degree走去揸搵食車？有幾多個仙氣女車長吖，咪玩啦。

所以即使而家啲港女要學車，理由都已經唔再係為一技傍身。比較好彩嘅，可能屋企本身已經有車俾佢揸，或者識着個男友係有車人士，而最常見嘅理由係覺得考到車牌之後，每次去旅行都可以自駕遊……總之一切都係出於玩多過乜啦。

老老實實，而家學車咁貴，冇一萬蚊都唔使諗，仲要預你一Take Pass喎，萬一要補鐘再考，埋單隨時唔只呢個價。啲小妹妹啱啱出嚟打工，月入先得一萬幾千，學車考牌食咗佢成份糧，如果唔係屋企或男友有架車等住你開光，駛乜急住考啫。

學車有林寶揸喎，梗係要開心些牙。（鄒莉盈Facebook）

學車係唔少公眾人物嘅日常趣事。（卓韻芝Facebook）

無論係因為咩理由都好啦，但凡港女學車都有一套指定動作：就係乜鬼都影張相擺上網些牙！本身可能只係純分享冇特別意思嘅，但當個Facebook/Instagram多咗張揸車相，成件事就好似好中產，一個唔該俾佢考到仲巴閉，即刻要加句：「唓，一Take Pass，無難度嘅！」如果考唔到呢？即刻上網公審個師傅話佢語氣唔好脾氣又臭，一係就話架車唔好揸，又賴其他車唔肯讓佢出先，甚至連個考官都鬧埋：「人哋已經着一字膊短裙都唔俾我Pass，個後轆hi到少少條界啫，駛唔駛咁嚴呀，合格咗自然會再補鐘慢慢練啦。」

考到牌梗係第一時間post上Instagram威吓。

而家啲教車師傅會同成功Pass嘅學生影相擺上網做宣傳。

呢啲正正就係港女心態，又唔反省下做錯咗啲乜所以肥佬，淨係識上網發爛渣，佢身邊啲朋友梗係唔會駁佢啦，反而勁俾Like 助長佢添。呢啲Friend累死你呀女，俾你真係揸架車出街，馬路上冇人會理你係男係女，只要做錯一個動作，累到人又累到自己呀。所以啲港女真係放低晒啲小姐脾氣先好去學車，虛心啲學嘢，俾人鬧就反省下，唔好成日預咗全世界都讓你，想手車好，就先要人品好。

而港女身邊嘅男人最擔心嘅係，佢哋連筆試都過唔到，所以成日提佢哋溫書：「如果你連筆試都唔合格，真係唔好再諗揸車啦，你個腦裝唔到咁多交通規例，會死人㗎！」偏偏啲女仔對住白紙黑字又真係叻啲嘅，記資料比男人專心同上心，所以佢哋十個有九個考完筆試出嚟都會認叻：「我肯定自己啱晒，一條都冇錯，一定Pass！」好好好，比你100分啱晒好未，但係點解一到實戰就雞手鴨腳？咪就係因為天生膽唔夠大，反應又慢，又冇控制機器嘅天分囉，最重要係成日以為啲人會讓路俾你，如果淨係識咁諗，唔該你返火星啦，條馬路好危險㗎。