[唔係原班人馬]《溏心3》演員班底落實 邊個in?邊個out?

近年無綫劇集收視同口碑越來越差,為咗挽回劣勢唯有出絕招「拍續集」!無綫其中一套叫好叫座嘅劇集《溏心》系列係由「金牌監製」劉家豪一手打造,之前嘅《溏心風暴》同《溏心風暴之家好月圓》都有爭身家嘅劇情,一班師奶觀眾就好受落,當年《溏心風暴之家好月圓》收視更加破50點,同05年嘅韓劇《大長今》平起平坐。所以無綫已經決定明年2月或3月開拍40集嘅《溏心風暴3》,希望可以藉此掀起返「煲劇潮」。

《溏心》系列第一、二輯故事背景分別以海味舖同餅舖為主題,不過今次第三輯就會更貼地,以茶餐廳為背景,而故事會由夏雨開茶餐廳暴發開始。

好多人都好關注嘅《溏心3》演員嘅班底亦已經落實,一班靈魂人物「大契」李司棋、「細契」關菊英、夏雨、米雪等已經落實參與,通通會繼續撐起頭家,不過「常在心」鍾嘉欣、「程亮」林峯、「卓文麗」楊怡同「唐至欣」陳法拉就因為各種理由未能參與拍攝,繼而由一二輯都有份嘅黃宗澤領軍加上無綫新寵黃翠如、陳敏之、岑麗香同王浩信等人取而代之。

大家又鍾唔鍾意呢個新班底呢?