【唔止月曆】亞視柒件事 新聞播裸女 誤報死訊 球星唱生日歌 邊單最失禮？

亞視真係永恆！上個禮拜亞視Facebook出post，將1999年嘅月曆照出土，當中藝員嘅造型同pose都令人相當尷尬～

不過亞視嘅失禮事件又點止一輯月曆相？歷年來呢柒件事﹐真係開創本地電視史先河！

新聞誤報江澤民死訊 被罰30萬

2011年7月6日，亞視《六點鐘新聞》報導中共中央前總書記江澤民病逝的消息，又將畫面上的台徽轉成灰色，本來安排當晚有相應特備節目，但後來被抽起。

由於未能證實消息，多個媒體都以引述亞視消息作報導。翌日，新華社發稿指「江澤民死訊」純屬謠言。同日，亞視撤回報導並致歉，而亞視高級副總裁（新聞及公共事務）梁家榮表示，已盡最大努力但仍未能阻止事件，負全責引咎辭職。12月，廣管局表示就「死訊」事件收到45宗投訴，決定向亞視罰款30萬。

又係新聞 裸女閃現畫面

1996年1月，《午間新聞》一段有關德國酒店大火嘅報導，畫面中途突然插入2名上身全裸洋女郎嘅片段，維時6秒。事後廣管局半日內收到33宗投訴，經查證後指事件係人為破壞，將路透社另一單澳洲沙灘飛鏢比賽嘅裸女片段插入新聞錄影帶，並非蓄意行為，當局只係向亞視發出提醒。

岩布仙尼Happy Birthday To Me

呢單真係網民至愛！2004年亞視台慶，請嚟當時正在訪港嘅意甲勁旅AC米蘭出席，司儀朱慧珊就搵同亞視同日生日嘅AC球星岩布仙尼唱返首生日歌，岩布仙尼好無奈咁唱Happy Birthday to ME，場面十分尷尬。事隔十幾年，岩布仙尼41歲生日當日喺IG出post，仲加上hashtag ＃happybirthdaytome，香港網民立即「獻上」當年片段幫岩布仙尼賀壽……

台慶觀眾走清光 掟壽包無人接

亞視向來同內地關係密切，2012年台慶更加大鑼大鼓上北京搞台慶show，但係可能星光唔夠熠熠兼且北方觀眾都唔認得亞視幾多個藝人，觀眾未完場就閃人，到最後嘅祝酒及派壽包儀式，場內空凳處處，難為參與藝人仲要扮high掟壽包上無人嘅觀眾席。網友恥笑話「係咪神功戲？」。

一邊拖糧 一邊晒銀紙

2016年亞視處於「執笠」邊緣，估計有400名員工被拖糧好一段日子，臨時清盤人指新投資者司榮彬未能提供資金營運，亞視隨時停播。點知司榮彬嘅代表之後喺記者會上，拎出一篋報稱有500萬嘅現金，同埋一張500萬支票，話係「送俾亞視」，又喺記者會上公布100億元投資大計。結果亞視都係喺嗰年4月1日凌晨熄機收場，「100億元投資大計」最終都係只聞樓梯響。

反對政府發牌 王征政總外跳舞

2012年11月，亞視主要投資者王征、亞視高層盛品儒帶住一班亞洲先生及亞洲小姐，以「亞洲會」名義去到政府總部門外舉行集會，反對政府發出新免費電視牌照，活動仲要喺亞視全程直播。而集會環節莫名其妙地包括一眾藝人跳《江南Style》，王征都跳埋一份，極之騎呢。結果呢個節目收到2000宗投訴。

重播再重播 收視一點都冇

因為要節流，亞視去到後期大量播放重播節目，甚至年初二煙花匯演期間，竟然重播廿幾年前由亞視做贊助商嘅《亞視煙花照萬家》，甚至連2015年倒數節目都係播返2011年嗰個，十分環保。但係觀眾冇面俾，2010年起開始出現節目0收視點嘅情況。