回復自由身菊梓喬即亮相HOY TV節目 自揭獲三間唱片公司招手

現年37歲嘅前「星夢一姐」菊梓喬（Hana），曾雄霸TVB劇集主題曲，風頭一時無兩，不過自從前星夢CEO何哲圖（Herman）離巢後，菊梓喬就疑似被投閒置散，曝光率及人氣都大不如前。去到前日（10日），菊梓喬喺社交網站宣布離開無綫旗下唱片公司TVB Music Group（前身星夢娛樂），並以黑底白字寫上：「感謝這2555天終於來到這一天，這段時間一直回憶著過去，很不舍（捨），有喜有悲，百感交集」及「還是需要時間來消化......」。之後，佢旋即喺噚晚（11日）為HOY TV新春節目《龍騰灣區歡樂年》進行綵排。

早前在家中跌傷腳嘅菊梓喬，噚日撐住拐杖現身，喺接受傳媒訪時，佢就話與星夢結束七年關係，好唔捨得。本身隸屬另一公司創意文化嘅佢，被問點解唔同星夢續約，佢就話係公司決定，大家保持良好關係，希望將來可以繼續合作。Hana對上一首歌已經係喺兩年前推出，所以佢好希望可以推出新歌，如果冇人幫佢嘅話，佢會自資出歌，因為佢一直都有寫歌；同時佢仲自爆有三間唱片公司向佢招手。另外，有指資源被《聲夢傳奇》及《中年好聲音》歌手瓜分，佢不甘坐冷板櫈，決定離開另覓新發展，而Hana就話合約本身喺呢段時間完結，大家合作做咗好好嘅音樂，覺得已經好圓滿。

Hana之後再被問到現身HOY TV節目係唔係向有線寬頻銷售及市場總監何哲圖報恩，佢就話好開心對方記得佢，俾個位佢唱歌，大家互相拯救大家。佢仲話有半年冇喺香港演出，如果TVB邀請佢拍劇都會參與，而佢早前參與嘅劇集《逆天奇案2》將於4月出街，到時要出席宣傳活動佢都冇問題。

至於何哲圖方面，佢就話知道Hana幾日前完約，而Hana得知今次係同廣東電視台合作都表示有興趣參與，佢今次係以獨立歌手身份出演。被指佢拯救Hana，佢就話對方係值得栽培，希望將來可以做唔同節目。至於會唔會同Hana簽約，佢就話要等對方公司處理，不過大家已經合作多年，合作性高又有默契，指對方希望參與唔同活動；同時仲大讚Hana好有實力，佢嘅歌曲喺內地亦都好受歡迎。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！