土耳其地震｜內地綜藝《非正式會談》30歲男星唐小強證實罹難

土耳其南部與敘利亞邊境2月6日發生7.8級大地震，救援人員爭分奪秒搶救，惟兩國遇難人數已超過二萬人，當中包括內地節目《非正式會談》常駐嘉賓30歲土耳其籍唐小強（Idris Talha Kartav）。

根據當地傳媒報道指，唐小強所住嘅阿德亞曼西亞酒店原先係公寓，不過後來違法裝修成為酒店，而喺裝修嘅過程中導致多面承重牆被破壞，所以建築唔夠堅固，抗震能力不足。而唐小強喺地震發生後就開始失聯，經過89個鐘頭嘅救援行動後，今日（10日）凌晨喺其下榻嘅酒店搵到包括佢在內10人嘅屍體。唐小強喺瓦礫中被發現時已經冇生命跡象，喺現場嘅爸爸及哥哥喺辨認屍體時不禁痛哭。

唐小強好朋友歐瑪喺地震發生後，喺微博不斷更新好友嘅救援最新狀況，不過可惜去到10日凌晨2時會出PO證實好友離世消息：「我的一生好兄弟唐小強已確認在本次土耳其地震大災難中遇難，各位請不要再傳他的信息，尊重家人和親朋好友的感受。我失去了一個親媽生的一樣的弟弟，inshaalah你的美麗靈魂將送往天堂的最的高地位，唐小強弟弟。Allah rahmet eylesin.感謝各位支持這個大好人，請你們記住他，記住他美麗的靈魂。 ​​​」

30歲嘅唐小強喺土耳其出世，2010年前往內地留學，並畢業於廈門大學海外教育學院。畢業後大部分時間都喺內地工作，之後佢成為湖北衛視綜藝節目《非正式會談》嘅固定嘉賓。 唐小強作為該節目嘅土耳其代表，佢不時發表精彩言論，再加上幽默嘅說話方式，深得觀眾喜愛。唐小強今次返土耳其嘅目的主要係探親，當時佢參加一個43人嘅導遊團，可惜佢喺地震中不幸遇難，留下正在懷第二胎嘅太太及3歲女兒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！