夠高質無懼競爭 楊政龍疫市擴展影業 開戲剛柔並重

·3 分鐘文章
楊政龍對娛樂事業有信心,旗下戲院愈開愈多間。
楊政龍對娛樂事業有信心,旗下戲院愈開愈多間。

英皇主席楊受成兒子楊政龍(Alex),最近升任英皇電影副主席。對於近年公司投資數億元拍電影及開戲院,無懼「疫」市,Alex明言睇好娛樂事業,並笑指「The show must go on」,未來會繼續與名導張藝謀及姜文等合作,亦會與曾志偉及鄭伊健等拍攝溫情、勵志片,為影壇注入多元化力量!

英皇電影副主席楊政龍日前在尖沙咀旗下戲院接受訪問,對於近期公司動作多多,除了投資3.5億拍攝電影《金手指》外,英皇戲院最近又宣布進駐銅鑼灣時代廣場,並斥資7,000萬重新裝修,在港戲院版圖擴展至第7間,而澳門亦將有首間英皇戲院。疫市下不斷投資,可謂膽識過人,對前景相當樂觀。

Alex透露計劃「陸續有嚟」,將開拍2部新片,當中包括由曾志偉監製及主演的《出租家人》,由陳家樂、周家怡及恬妞合演溫情喜劇;另一部則是勵志電影《深宵閃避館》,由鄭伊健擔任主角、羅志良監製。

超支不值一提

問Alex可擔心疫市下難回本?他說:「疫情令各行各業出現困難,但我覺得衣食住行係必須,好似圈中人成日都會講個句『The show must go on!』戲院同電影喺確保安全嘅情況下應該繼續發展。好似拍電影咁,我哋一路拍好多唔同類型嘅電影,迎合不同觀眾嘅需求;戲院方面,除咗好嘅影音設備,我哋亦不斷提高食物質素,推出好多創新嘅小食同飲品。好多人會話網上串流觀影平台會影響戲院生意,其實當年啱啱有電視睇都話戲院會受影響,但其實人與人之間嘅互動,都離不開行街、睇戲、食飯,最緊要係不斷進步,總有發展空間。」

Alex擔任總策劃的電影《懸崖之上》,票房超過11億人民幣(約13.3億港元),成績極好。談到該片受疫情影響曾停拍近2個月,應超支不少,但他覺得比起台前幕後在冰天雪地開工的辛勞,少少超支實在不值一提,更直言很希望繼續與導演張藝謀合作,至於會否拍續集,則要再跟張導商討故事能否有延續性。

讚霆鋒不斷進步

本身是電影狂熱分子的Alex,所有類型的電影都愛看,直言投資電影會以市場主導。至於起用演員方面,他指公司旗下有不少藝人,謝霆鋒、容祖兒及Twins等都是很好的選擇:「簽我哋嘅藝人都好似一家人咁,大家合作得好開心。有日我見到霆鋒,講開佢依家40歲,人生有成3分2時間喺英皇,呢件事真係好奇妙。大家睇到佢嘅變化,由歌手到演戲,新戲《怒火》亦就快推出,好多嘢不斷進步。仲有吳浩康、陳家樂都係好多元化嘅藝人,所以開戲的話,我哋都想優先考慮咗自己公司有冇適合人選先。導演方面,劉浩良、郭子健,以至張藝謀、姜文嚟緊都會有好多合作。」

霆鋒一直留在英皇家庭,與Alex惺惺相惜。
霆鋒一直留在英皇家庭,與Alex惺惺相惜。