大劉劉鑾雄突開記招被問有冇睇《愛回家》 直指有女演員塊面唔郁：笑起上嚟硬膠

劉鑾雄（大劉）今日下晝突然間召開記者會，回應網上多宗傳聞，包括係被指因為投資恒大而慘輸 200 億等等。除咗回應有關傳聞之外，一向係TVB處境劇《愛回家》粉絲嘅大劉就被記者問到最近有冇收睇，大劉就表示「耐唔耐有」，仲透露劇中有女演員塊面唔郁：「笑起上嚟好似硬膠咁樣，啲肌肉實到唔識郁，男就好少整到咁硬膠，多數係女啦，真係唔識郁㗎喎啲肌肉笑起嚟，人哋都係為咗揾食」，不過佢就廢事人哋以為佢針對嗰位演員而拒絕開名，結果惹嚟唔少網民揣測究竟大劉講緊嘅女演員係邊個。

《愛·回家之開心速遞》由2017年起開播至今已經播出超過2000集，當中曾經參演嘅演員多不勝數，而常駐嘅主要女演員就包括：滕麗名（飾熊尚善）、呂慧儀（飾熊若水）、湯盈盈（飾高栢菲）、古佩玲（飾申瑞素）、林淑敏（飾大小姐龍力蓮）、蘇恩磁（飾二太佘秀琴）、樊亦敏（飾三太白天娥）、沈可欣（飾葉碧嘉）、姚瑩瑩（飾Helen姐）、許思敏（飾群姐）、何芷姍（飾馬美娜）、林凱恩（飾譚育英）、葉蒨文（飾Candy）及孫慧蓮（飾「食屎陳師奶」）等等。

其實大劉都唔係第一次公開提及《愛回家》，喺年初嘅記者會回應被影到同呂麗君一齊時，佢就提到《愛回家》角色，「食屎陳師奶」，仲話如果冇睇《愛回家》有少少失敗：「你哋有無睇《愛回家》呀？無睇《愛回家》呀？你哋有少少失敗喇。我晚晚無嘢做食飯就會睇《愛回家》，《愛回家》有個角色叫「食屎陳師奶」，咁我唔知嗰個有無食屎，係咪陳師奶，抑或八師奶，諸事嘅諸師奶，就攞個電話影緊我相，當我見到佢用相機影我嗰時，影到呂麗君，我就好嬲，因為我就唔想畀人見到誤會，或者畀人造謠，話我哋出嚟行商場復合。」