天地男兒｜陳松伶與老公張鐸無懼8年年齡差 甜蜜人生背後曾被至親背叛致抑鬱

陳松伶有份演出嘅無綫劇集《天地男兒》於深夜重播；陳松伶15歲時憑歌唱大賽冠軍而簽約無綫電視，因《天涯歌女》爆紅，亦多次奪得兒歌金曲獎項，被譽為「兒歌天后」。近年，陳松伶長駐內地發展，與細8年老公張鐸頻頻以夫妻檔上節目放閃，幸福滿滿；但原來陳松伶有一段悲慘童年經歷，患過抑鬱症，直至遇上張鐸先至振作起來。

15歲就入行嘅陳松伶，有指係因為媽媽當時逼佢放棄學業，賺錢養家，亦時時被家暴，所以與家人鬧翻並寄居於契媽家，15年間與兩個契家姐感情良好，由於對佢哋信任度極高，陳松伶將自己嘅人工全部畀晒屋企人，但有一日突被趕出門，完全無積蓄嘅陳松伶只能帶住幾件衫離開，亦無法支付卵巢腫瘤手術費。陳松伶慘遭至親背叛令佢患上抑鬱，加上2006年爸爸離世雙重打擊，每日只想困自己喺屋企；最終陳松伶決定離開傷心地轉到內地拍劇，無心插柳下認識到內地演員張鐸，並於2011年結婚。

雖然陳松伶與張鐸8年年齡差不被看好，但陳松伶總喺節目有意無意間透露幸福，又表示張鐸喺自己抑鬱症4至5年期間都無嫌棄佢，反而係接納與扶持自己；而呢份愛亦讓張鐸媽媽支持佢哋每一個決定；陳松伶於內地綜藝節目《婆婆和媽媽2》分享，奶奶一直渴望抱孫，但基於自己結婚時已40歲，又曾患卵巢腫瘤未能成功人工受孕感到內疚，但奶奶就表示已經唔在乎抱孫，反而安慰陳松伶唔好為生小朋友而煩惱。陳松伶常於社交平台分享愛情保鮮之道，亦大讚張鐸極度自律，能夠抗拒誘惑；至於張鐸就極寵妻，例如早前陳松伶被指發福，張鐸就分享與陳松伶多張唔同時期合照，並寫道：「也看得出姐姐確實給我養胖了，誰說養多肉（植物）是本事，我把人養成肉肉也是本事。」 ，字裡行間似是處處維護陳松伶。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！