2024太安樓美食合集！地道台灣地瓜球、創意吉列墨魚漢堡

講到掃街又點少得西灣河太安樓，今日同大家搜羅吓有咩新嘅小食同屹立多年嘅實力小店健在啦！

地道台式地瓜球 老兄苔

每次去台灣都要食嘅地瓜球，呢度都有得食喇！呢間新開嘅小店特意購入台灣夜市專用嘅地瓜球機，所以質感真係似到十足，地瓜球粒粒金黃，空心Q彈外脆內軟，煙煙韌韌咁真係愈食愈上癮呀。口味方面有6款，包括原味、美奶滋肉鬆、花生朱古力、黑芝麻、梅粉同椰茸朱古力；推介美奶滋肉鬆，鹹香嘅肉鬆配上濕潤嘅美奶滋，加埋熱辣辣又香甜嘅地瓜球，鹹鹹甜甜好滋味，難怪係人氣No.1！

吉列墨魚漢堡+和牛竹炭漢堡 Cafe Whale

創意漢堡小店，每一款漢堡有特色得嚟都好高質。好似呢個芥末蛋黃醬吉列墨魚漢堡，吉列墨魚扒厚身彈牙，入面仲有好多墨魚粒，口感超好又有鮮味，芥末蛋黃醬令成個包冇咁膩。而和牛竹炭漢堡肉味濃郁又juicy，加埋芝士更添鹹香，加入大量生菜幾解油膩感。另外佢哋嘅魚類產品嘅魚都係由魚市場直送，好似黑松露沙巴龍躉漢堡同炸魚柳，食得出魚油香。

新派窩夫 識食

一間新開主打窩夫同串燒嘅小食店。佢哋嘅窩夫有多款口味，包括懷舊系列、香辣系列同創意系列，牛油果甜奶窩夫加上大量牛油果蓉，配上煉奶後甜度適中；柚子雞扒窩夫都係一個好好嘅鹹甜配搭，當正餐都幾飽肚。另外仲有唔同嘅串燒即叫即燒，如秘製燒豬頸肉、燒Q彈蝦滑串同燒墨魚咀串都值得一試。

特色炸皮蛋 姊妹美食

屹立多年嘅煎釀三寶專門店，主打大量炸物，有唔少都幾特色㗎～好似呢個泰式炸皮蛋，坊間都比較少見，外面唔係普通脆漿，而係包咗層魚肉，加少少泰式辣醬好好味！另外炸雞皮都唔錯，炸晒啲油脂出嚟食落超香口！

港式傳統餅店 金樺餅店

好港式嘅傳統餅店，最出名就係牛油皮蛋撻，餅皮香脆重牛油香，蛋漿仲有少少流心，烤焗時間控制得好好。另外仲有好多傳統餅店先搵到嘅麵包同蛋糕，如椰絲奶油包、三角朱古力蛋糕同合桃酥等，真係兒時嘅味道呀。

文：Yanica
編：Cathy