《女人要學識聰明，都要學識愚蠢》

香港好多好叻嘅女人，更多係又叻又單身嘅女人，而佢哋通常會將自己無拖拍歸究於「男人淨係鍾意蠢女人嘛～」。

的確，男人年輕嘅時候多數都會偏向揀啲比自己蠢嘅女人，容易控制，又唔會叻過自己先可以滿足男性嘅英雄感。但男人開始長大，就會開始想搵一個同自己溝通到，而唔係一味喺度「真係㗎？」「點解嘅？」只識盲目崇拜自己嘅小妹妹。

女人唔係夠蠢就有用，最叻嘅女人係懂得幾時聰明，幾時愚蠢。男人都需要英雄感，自己女朋友太叻會自卑會好大壓力，所以女人要識得搵個位畀男朋友威。意思係你知道你男朋友擅長啲咩，就要畀機會佢表現，滿足一下佢嘅英雄感。例如我男朋友對於政治歷史好叻，於是有機會我就會問佢，等佢滔滔不絕解釋我聽，然後佢就自覺自己好叻。女人，要學識向男朋友請教同求助，有時候即使自己都可以做到嘅事，都要放手去畀男朋友幫助自己。

同時，女人都要喺適當時候聰明。長大咗嘅男人唔會一味喜歡無知嘅女仔，所以要識得同男朋友溝通。男朋友遇到煩惱或唔開心嘅時候，需要嘅就係一個聰明嘅女朋友，識得安慰又識得畀意見，唔需要驚天動地嘅絕世好橋，只需要喺適當時候講番適當嘅說話，唔好似個小妹妹，聽唔明仲要解釋番轉頭。

做個蠢女人其實好易，但做個懂得扮蠢嘅聰明女人就好難。不過男人其實都好似個細路仔咁，當你識得同小朋友玩遊戲時，有啲時候扮蠢畀小朋友贏，你就會識得喺男朋友面前適當地傻豬了～