「女配」大熱諗定表情 陳自瑤封印黑面 攞獎未必多謝老公

事業與家庭均處於開心狀態的陳自瑤，昨日宣傳新劇時心情大靚，對於成為無綫頒獎禮「女配」大熱，她自爆與家人已盡力拉票，為免再被鏡頭捕捉黑面，更承諾會保持笑容！

陳自瑤（YoYo）、陳曉華（Hera）、何廣沛與吳業坤等，昨日出席無綫新劇《異搜店》宣傳，期間分組玩遊戲，又齊齊唱聖誕歌，氣氛熱鬧。戴上鹿角頭箍的YoYo非常養眼，透露將於下周播出的新單元出現，由於劇中飾演病患，要化超淡妝呈現病容，又有很多爆喊戲，笑言希望播出時不要嚇壞觀眾！

談到憑劇集《寶寶大過天》成為下月頒獎禮「最佳女配角」大熱，YoYo多謝大家支持，又自爆已在網上拉票：「雖然朋友同屋企人嗰邊冇乜拉，但哥哥叫晒朋友、同事一齊投，仲叫我請佢食飯。（信心大增？）每年都估唔到，開心係同事、朋友都話睇好我，入到5強已經好滿足！」提到上次老公王浩信封視帝時公開多謝她，她卻被拍得黑面，問到今年會否練定表情？她笑說：「冇事嘅，上次係一剎那啫！今次會好好笑容，放心。（到時攞獎多謝番老公？）諗吓！因為都未諗。」她又透露聖誕節要開工，問女兒可有投訴？她說：「我唔使開工嘅時間都陪佢。（一家3口去玩？）呢排有啲忙，會叫埋屋企人。（父母一齊，意義唔同啲？）都係，有時間會安排吓。」

何廣沛撐陳曉華有進步

此外，劇集反應不俗，演技曾被狠批的Hera謙虛說：「我知自己仍有好多不足，都擔心觀眾會睇得唔開心，好在啲評論係舒服嘅。（放鬆晒？）唔係，但睇番1年前嘅演技，真係差好遠。」拍檔何廣沛讚她有進步：「佢好大壓力，但經過幾個月拍攝同調教，係進步咗嘅。」提及聖誕節，他透露已相約方紹聰及郭子豪開派對，問為何不約緋聞女友朱晨麗？他說：「睇吓有冇時間啦！又要拍劇同搞網上節目嘅嘢。」