妳不是她｜葉蒨文貼身裙盡現弗爆葫蘆身形 演巴渣港女入型入格

TVB熱播劇集《妳不是她》由馮盈盈及丁子朗主演，演員陣容夠晒新鮮，尤其係彭慧中及葉蒨文（Sophie）嘅表現均得到網民好評。其中，網民大讚演繹柳創山（袁文傑飾）與Miranda（姚嘉妮飾）第三者嘅葉蒨文將巴渣港女Fiona演得入型入格，就連佢自己都估唔到網民唔討厭之餘，仲封佢做新一代女神；佢亦坦言角色有一定難度，因為其角色與真實嘅自己相差太遠，認為角色係一個情商有啲低嘅女人，單純直接又冇咩智慧，只要鍾意就會不顧一切咁向前衝，拍攝前要做好多功課。

除咗挑戰巴渣角色，葉蒨文於戲中更需要與袁文傑拍床照。不過，葉蒨文直言拍攝過程一啲尷尬都無，認為演嗰陣時投入就唔會尷尬，加上有事先打底及覺得袁文傑係一個好優雅同有禮貌嘅演員，故此非常放心。而葉蒨文於劇中經常以貼身裙搭配高跟鞋造型亮相，露出修長美腿及將弗爆葫蘆身形呈現，令觀眾嘆為觀止。葉蒨文除咗常做運動keep住最強Body，佢更加想多謝媽咪，表示自己小學時係田徑隊，中學係中國舞校隊，可能因為由細到大有唔同嘅訓練而為身體打好咗個根基。葉蒨文又指，認為要行好每一步路，如果用啱力行每一步路個臀部會挺身啲；因為骨盆前傾會令到有肚腩仔及臀部下塌。

31歲嘅葉蒨文喺中五畢業後前往英國升學，於名牌大學京士頓大學完成服裝設計系學士學位，2016年參選香港小姐，可惜32強出局。未有放棄入行嘅佢，修讀訓練班後由路人甲做起，後來加入處境劇《愛·回家》劇組，原本只係飾演一個冇名嘅大學生角色，不過之後獲監製睇中飾演固定角色Candy、，更憑角色成功彈出，深得網民喜愛。去到大前年，葉蒨文獲得無綫經理人合約，成為親生女，同年年底獲提名競逐「飛躍進步女藝員」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！