姜濤泥鯭風波｜盧覓雪開咪談泥鯭@Rubberband再惹罵戰 網民撐：雪雪咁錫MIRROR

日前（7日）人氣男團MIRROR成員姜濤喺《CHILL CLUB 頒獎禮》獲得「年度男歌手」銀獎時上台向另外11位隊友發表感言引嚟唔少討論。Rubberband成員泥鯭（黎萬宏）喺社交平台嘅一連串發文亦都引起唔少爭議，更加引起大批網民網上「駁火」；最後喺10號晚上，RubberBand 喺 FB 發文，表示隊友近日失言而引起嘅風波，團隊感到非常抱歉，而泥鯭亦將所有相關帖文全數刪走。本來以為事情告一段落，點知有其他藝人亦都相繼加入爭議之中，當中就包括盧覓雪，佢喺今朝（12日）開咪《在晴朗的一天出發》時更加再以「薑絲蒸泥鯭」開玩笑，仲唔介意成為攻擊目標，笑言：「我今日坐正喺中間，終於明白坐正感覺」。

對於泥鯭同姜濤嘅風波，盧覓雪噚日（11日）喺《在晴朗的一天出發》開咪時就指「睇唔過眼」，認為每個人都有言論自由，更加指︰「其實有啲嘢與我無關，一個人批評一個人，我純粹喺側邊見到佢批評佢，但係因為你批評一個人而遭受到一村人、一群人圍攻呢個人話『你做乜批評佢呀？』咁我覺得呢個現象不可取！人多就聲大，聲大就夠惡，係咪呀？個時代變遷咗，我明白，但係我哋呢啲老派人，睇嘢有自己嘅一套標準。我年紀大，我愈見到呢啲嘢愈刺眼，愈唔舒服，覺得點解要咁樣呢？」

佢又認為每個人都有言論自由，仲話如果每次批評完要道歉嘅話，佢每日都要同人道歉，仲話：「有啲道歉係『我怕咗你囉，我同你道歉囉』，即係息事寧人，費事煩落去，有手尾跟。」不過呢一番言論就引嚟唔少網民去到《在晴朗的一天出發》fb專頁同盧覓雪社交平台留言，指泥鯭嘅言論包含粗口，已經唔係單純批評而係攻擊咁簡單。

去到今日（12日），盧覓雪喺《在晴朗的一天出發》開咪時雖然冇回應事件，不過喺分享要聞嘅時候就提到：「尊子嘅作品一日之間喺公共圖書館消失全數被下架，咁睇嚟整返碟姜絲蒸泥鯭安全好多喎！」，又指「今日我坐正喺中間，終於明白坐正感覺」，繼續以相關內容發言，似乎冇被網民嘅留言影響，亦都唔介意成為被攻擊對象。

事後唔少網民亦都繼續喺《在晴朗的一天出發》留言聲討，不過同時亦都有網民力撐盧覓雪，仲有人指其實盧覓雪只不過係對事唔對人，話佢其實一直以嚟都好撐都好錫MIRROR同ERROR，更加喺MIRROR未大紅大紫嘅時候已經有合作又幫作哋宣傳等等。