婚禮現場執樹枝 吳浩康娶老婆喊唔停 最愛郭思琳顧家

英皇歌手吳浩康與郭思琳雙喜臨門，兩人別樹一幟，選擇在離島的營地簽字註冊，在荒山野嶺執樹枝布置場地。婚禮上，一對新人變成「大喊十」，正式展開「恐怖」的婚姻生活！

吳浩康（Deep）與「格鬥女神」郭思琳早前宣布奉子成婚，昨日在大嶼山貝澳營地舉行婚禮。由於疫情關係，一對新人未有邀請太多親友出席，但表示會補辦婚宴。新郎哥自爆婚禮前失眠了兩晚，綵排時已忍不住喊，在簽字儀式上與老婆同樣喊不停，Deep表示：「特別係見到爸爸喊，我冇乜點停過喊。」而思琳見老公喊到「決堤」，自己也忍不住喊：「佢太眼淺啦，我成日要安撫佢。」

婚禮上Deep對太太發表愛的宣言，感激對方陪伴：「多謝佢願意嫁畀我、願意同我一齊去經歷我哋嘅人生、願意同我一齊去遮風擋雨。我哋各自對大家嘅承諾，就留番畀我哋兩夫妻啦！」思琳笑說：「佢同我結婚已經係一個承諾嚟，所以佢唔使講，我已經收到晒。」

Deep自爆籌備婚禮期間發生很多蝦碌事，因運輸受疫情影響，他們為婚禮場地訂了的大部分裝飾都未有送到，結果要在山邊執樹枝布置，他說：「唔理係咪疫情，婚禮都最難忘，因為冇經驗，蝦碌百出，冇一個十全十美嘅婚禮，感謝太太嘅包容。」談到婚後第一課，思琳笑言要「見識」婚姻的恐怖：「我太多嘢要學，學做好嘅太太、好嘅媽媽。好多人話結婚後係另一個境界，我都想快啲經歷吓，睇吓有幾恐怖。」

感激老闆送祝福

對太太讚不絕口的Deep，表示很享受彼此的相處時光：「佢唔只對父母好上心、好愛錫，對家人都好關心同照顧，好欣賞佢對家庭嘅態度。」但笑言不能亂畀分，因為太太絕對高於滿分，又指婚後要重新調整自己的心態。

快將升任爸爸的他對胎兒性別保持神秘，表示不論仔女他都同樣鍾意，並透露老闆楊受成會封大利是給BB：「收到老闆嘅祝福已經好開心啦，因為老闆真係睇住我成長，照顧咗我20年，都係我半個爸爸。有咁尊敬嘅人嘅祝福，已經係好大嘅禮物。」