家族榮耀｜劉悅模特兒轉型做演員 挑戰小三角色勾引黃浩然獲關注

由張智霖、楊茜堯（前名楊怡）、李彩華、黃浩然、羅子溢（前名羅仲謙）及熊黛林等人主演嘅TVB外購網劇《家族榮耀》喺星期一（7日）首播，劇情主要圍繞豪門大家族勾心鬥角，成功吸引唔少觀眾收睇。除咗主要演員有不俗嘅表現之外，連配角都備受關注，當中包括飾演黃浩然情婦Mandy Lin嘅劉悅（Jenn）。

劉悅飾演嘅Mandy喺第三集出場，一出場就已經喺酒吧勾引馬耀祖（黃浩然飾），更加成為馬耀祖嘅小三，噚晚嗰集Mandy仲甘心做小三，話要做成功男人背後嘅女人。去到今晚嗰集大婆Sammie（楊茜堯飾）踩上門同佢攤牌，不過呢位小三未驚過，依然霸氣十足；不過之後佢嘅下場可以話係相當淒慘。

現年24歲嘅劉悅喺香港專業教育學院修讀化學科技高級文憑畢業，加入娛樂圈後與熊黛林及 Angelababy（楊穎）屬同一模特兒公司，前年開始由模特兒轉型做演員，參演ViuTV劇集《地產仔》，喺劇中飾演索爆地產經紀Carmen，為咗演好呢個角色，佢仲去到讀甄詠蓓老師嘅演藝課程。其後劉悅再與李佳芯（Ali）合作拍廣告微電影《 可能一直都在 》及與沈殷怡等人參演電影《母夜叉》。去到《家族榮耀》，Jenn挑戰小三角色，成功獲得網民關注。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！