家族榮耀｜強大卡士加豪門恩怨劇情夠吸引 麥翠嫻陳梅馨相隔廿幾年再現TVB

TVB外購網劇《家族榮耀》前晚（7日）首播，由於劇集早於1月率先喺內地優酷視頻及myTV SUPER等影視平台播出，所以劇集已掀起一定話題，當中楊茜堯（原名楊怡）與張智霖一場激烈親吻戲更於早前登上微博熱搜。

《家族榮耀》首集劇情講述馬家舉行世紀婚禮，馬耀祖（黃浩然飾）和馬耀堂（羅子溢飾；原名羅仲謙）分別迎娶好姊妹甄芯（楊茜堯飾；原名楊怡）與賈洛儀（李彩華飾），婚宴翌日黃浩然捲入行賄案，而初入豪門嘅楊茜堯與李彩華已感受到家族人際關係複雜。及後劇情將會講述楊茜堯黑化對付李彩華及與馬家大少奶（熊黛林飾）嘅紛爭，又會上映一場股份爭奪戰。

除咗好耐無睇到嘅豪門大家族勾心鬥角劇情夠吸引，好多演員都久未喺TVB亮相，強大卡士陣容都係追看原因之一，包括楊茜堯同羅子溢呢對現實夫妻喺劇中演叔嫂關係，另外余安安、麥翠嫻、陳梅馨係相隔廿幾年再拍電視劇，令觀眾大感驚喜。余安安喺1989年《千外有千》後就再無拍TVB劇集，呢次喺劇中飾演張智霖媽媽；麥翠嫻就飾演楊茜堯父母，亦係繼1995年《刑事偵緝檔案》和《廉政英雌之火槍柔情》後再次出演電視劇，1983年亞洲電視第一屆藝員訓練班畢業嘅佢轉投無綫後一直擔任配角，1990年代中期與商人老公結婚後息影，直到近年仔女大晒先復出，其女兒龔敏晴去年參加《2021年香港小姐競選》初選，麥翠嫻偕夫送女兒去面試，雖然未能入圍但60歲嘅麥翠嫻就被激讚保養得宜，拍住囡囡更似兩姊妹。

至於陳梅馨今次喺《家族榮耀》中飾演于洋二太太及梁靖琪媽媽，當年參加1988年度香港小姐競選而入行嘅佢先後拍過多套劇集、主持，不過對上一套TVB劇集已經係1997年《樂壇插班生》。而陳梅馨嘅感情狀況一直備受關注，過往與溫兆倫曾拍拖一年多，分手後，有指男方向女方追討14萬分手費，陳梅馨接受訪問時就表示唔想多提對方，只係提到當年年紀細，唔識處理感情事，並指而家係單身狀態。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！