家族榮耀｜黃浩然爆炸前鬧交戲被激讚 網民睇穿楊茜堯係隱藏boss

無綫劇集《家族榮耀》踏入第四周，呢兩晚嘅劇情更加掀起高潮及追看性，大批網民激讚劇中演員演技。星期一嗰集（2月28日）劇情講述馬耀祖（黃浩然飾）出獄後發現太太甄芯（楊茜堯飾）曾於結婚前與馬展鴻（張智霖飾）親吻，同時更得悉原來當初舉報而令佢入獄嘅人就係展鴻，於是耀祖向展鴻攤牌，逼令對方辭退馬氏職務，甚至斷絕好兄弟關係。

與此同時，耀祖相約大哥耀宗（郭政鴻飾）及弟弟耀堂（羅子溢飾）到茶室回憶兒時點滴，三兄弟再次決定團結一心；網民大讚各人喺短短一幕中，眼神及微表情上均有變化；據知，拍呢場戲前一晚，三位演員不斷於群組討論走位與承接位，而拍攝出嚟個效果各人都好滿意。

另一方面，耀祖發現情婦Mandy（劉悅飾）與女兒Jojo已死去，於車上質問甄芯點解咁狠毒，並指可以原諒佢出軌，但絕對唔會原諒甄芯令佢無咗個囡，逐提出離婚及親子鑑定，就喺佢咆哮講完：「甄芯，我同你緣盡於此！」一句就發生車禍及爆炸，呢場戲都令好多觀眾覺得黃浩然好入戲：「佢最好戲今次，但係又咁快死左，進步左好多」、「我最期待係睇Joe覆桌，但咁快寫佢死」、「嘩！嬲到爆嗰一幕，啲戲超正喎」等等。

噚晚（1日）劇情就講到，耀祖因爆炸而死亡，甄芯就受傷兼早產，雖然甄芯喺醫院醒返後第一時間向Chloe（李彩華飾）關心耀祖傷勢，但原來爆炸前佢係可以救出耀祖，但擔心會無晒現有嘅權力選擇見死不救，甄芯喺人面前哭得死去活來，但背後個眼神就好惡毒，網民就表示甄芯一直扮豬食老虎：「暴露本性」、「個女人勁恐怖」、「佢一早已經心懷不軌」等等，仲有醒目網民指甄芯其實一直都係隱藏boss，而接下來劇情將講述甄芯點樣要脅耀宗及大少奶（熊黛林飾），從而全權負責馬氏日常工作，展鴻又會將報仇行動升級，與馬家公開爭權，唔知甄芯之後仲有咩狠毒招呢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！