雅虎香港新聞 將為ViuTV拍新劇 重溫鄧萃雯經典劇集角色
鄧萃雯自從12年拍攝完劇集《金枝慾孽貳》後，就同無綫脫離賓主關係，主攻內地市場。唔少香港觀眾都好期待佢再拍港劇，等咗三年之後又三年，早前終於宣布佢出山啦！不過佢今次唔係返娘家，而係轉投ViuTV拍攝新劇。據知新劇喺9月就會開拍，鄧萃雯將會同陳錦鴻合作，喺劇中飾演夫妻。喺新劇未有得睇之前，不如我哋重溫一下鄧萃雯嘅經典劇集角色啦！
《巾幗梟雄》四奶奶－康寶琦（2009年）
鄧萃雯飾演嘅蔣家四奶奶（康寶琦）係劇中嘅靈魂人物，佢心思慎密、堅毅不屈、堅守承諾又有承擔，每一次屋企或者米舖有困難，佢都會諗盡辦法去解決，搵好戲嘅鄧萃雯飾演真係不二之選。除此之外，佢同柴九（黎耀祥飾）由上司下屬去到生死之交嘅知己，當中柴九多次幫助四奶奶，同時亦闖唔少禍要四奶奶出手相救，唔少觀眾都好鍾意睇佢哋呢種複雜嘅關係。最終鄧萃雯憑四奶奶一角獲得視后，真係實至名歸！
《巾幗梟雄之義海豪情》九姑娘－鄭九妹（2010年）
《巾幗梟雄》四奶奶嘅熱潮未退，嗰頭《巾幗梟雄之義海豪情》接住出街，唔少人都好期待鄧萃雯同黎耀祥嘅再次合作。今次佢喺劇入面飾演聰明絕頂但心狠手辣嘅黑社會大家姐鄭九妹（九姑娘），佢同飾演劉醒（黎耀祥飾）有唔少對手戲，佢哋成功演繹九姑娘同劉醒嘅生死與共情義。劇中有唔少經典場口，例如九姑娘槍殺劉醒、扮俾日本人黑木少佐（李嘉飾）污辱向搵向山大佐（金剛飾）誣蔑佢及被捉去集中營等等。鄧萃雯更憑九姑娘一角蟬聯視后寶座。
《金枝慾孽》及《金枝慾孽貳》如妃－鈕祜祿·如玥（2004及13年）
經典宮廷劇《金枝慾孽》當年紅遍兩岸三地，唔少主要演員更名成利就。要成功演繹如妃呢個角色，真係唔係人人都做得到。鄧萃雯成功演繹駕馭角色，喺劇中如妃霸氣十足、持勢凌人、充滿野心及雖然身不由己但為取代皇后寶座而不擇手段等等。鄧萃雯雖然大熱倒灶失落視后獎項，但憑角色深入民心，獲得大眾支持，如妃成為大家心目中嘅經典角色。
《師奶兵團》蒙嘉嘉（2007年）
淨係睇個劇名都知道呢套劇以家庭主婦為題，講述現代師奶嘅酸甜苦辣，引起唔少家庭主婦嘅共鳴及熱烈追捧。鄧萃雯喺劇中飾演師奶阿檬，老公Joe由謝天華飾演，婚後育有一對龍鳳胎，做一個不修邊幅嘅踏實嘅全職家庭主婦。佢同葉童飾演嘅丁梅香係同學兼都係「風頭躉」，又係校内競爭對手，最後鬥到去屋村，敵人變成朋友之間產生唔少火花。另外，鄧萃雯喺現實生活係單身貴族，同佢喺劇中打扮樸素、帶住細路嘅家庭主婦，簡直係天壤之別，但佢仍然可以成功拿捏家庭主婦嘅精髓。
《女人唔易做》Hil姐－海翹（2006年）
佢喺《女人唔易做》中飾演連鎖百貨公司高層Hil姐，為咗事業努力奮鬥但忽略愛情，呢種女強人角色簡直係為佢量身定做。佢成功演繹出女强人嘅威勢，同時亦做到女人對愛情嘅猶疑不決。當時演技早已被肯定嘅佢拎唔到視后，好多觀眾都戥佢唔抵。
《我和春天有個約會》姚小蝶（1996年）
鄧萃雯有兩年過咗檔去亞視拍劇，當中最令人有印象嘅一定係《我和春天有個約會》，佢係劇中飾演姚小蝶，佢個角色由少女演到中年，絕對係演技大考驗。由於劇集當時喺內地熱播，所以令佢衝出香港，俾更多觀眾認識佢。
《倚天屠龍記》周芷若（1986年）
初出道嘅鄧萃雯大多拍攝古裝劇，嚟嚟去去都係飾演柔弱嘅女仔，雖然《倚天屠龍記》都係古裝劇，同梁朝偉飾演嘅張無忌就唔少對手戲。今次角色發揮空間比較大，所以俾人留意到佢嘅演技，成功晉升為一線花旦。
