將軍澳新開立食醬油拉麵店 大阪冠軍級拉麵師傅主理 推介鮮甜鰹魚醬油拉麵

·2 分鐘文章

眾所周知,日本好興立食文化,由立食壽司、立食燒肉甚至立食居酒屋都有,而呢種立食文化近年都慢慢傳到嚟香港。最新嘅有開喺將軍澳嘅一間立食醬油拉麵店。

呢間立食醬油拉麵店行時尚工業風格,並由連續5年喺大阪排名第一嘅拉麵達人松村貴大主理湯底,用上唔同嘅醬油混合、提煉,再加入多款貝殼類海產熬製,再由日本空運直送到港。大家試碗麵嘅時候,不妨都可以先嗶一匙湯底飲啖,唔會太鹹之餘,仲幾鮮甜。

將軍澳新開立食醬油拉麵店
將軍澳新開立食醬油拉麵店
最推介嘅一定係和歌山橫縞鰹魚醬油拉麵
最推介嘅一定係和歌山橫縞鰹魚醬油拉麵

餐廳主要提供4款口味嘅拉麵同埋幾款小食。當中最推介嘅一定係和歌山橫縞鰹魚醬油拉麵,湯底嘅醬油香中滲有香濃嘅魚味,連帶麵條都有陣陣魚鮮香味。日本直送嘅慢煮三和豚肉叉燒有陣陣煙燻過嘅香味,口感軟腍。

瀨戶內海小魚干醬油拉麵
瀨戶內海小魚干醬油拉麵

另一款同樣有魚香嘅拉麵係瀨戶內海小魚干醬油拉麵,但佢同鰹魚嗰隻湯底嘅香味又有啲唔同,呢隻係偏重少少鹹香,但同時又有種清甜。

鍾情重口味少少嘅朋友,青森黑白蒜味醬油拉麵應該最啱
鍾情重口味少少嘅朋友,青森黑白蒜味醬油拉麵應該最啱

至於鍾情重口味少少嘅朋友,青森黑白蒜味醬油拉麵應該最啱,幾款口味中味道最濃,無論係蒜香定醬油味都頗為突出。

日式小食
日式小食

小食方面包括有鰹魚汁浸菠菜、松村秘製餃子、日本海哲、胡麻章魚、帆立貝裙邊同埋味付粒貝。另外而家仲有新張優惠,喺指定位置打卡兼upload嘅話,就可以獲贈日式小食券一張。另外,喺舖頭消費就可獲免費北海道Icenoie Gelato義式雪糕券一張。

立食醬油拉麵店
立食醬油拉麵店
Ramen Yaichi
Ramen Yaichi


Ramen Yaichi
地址: 將軍澳唐德街1號將軍澳廣場1樓Kiosk A



文、相、片:Kar