專訪｜為夢想捱麵包也有型 否認唔抵得作歌畀人紅過自己 吳林峰：信好歌有好報

吳林峰新歌《捱麵包的人》，講述了在追尋夢想路上的掙扎和拼搏，經歷低潮的心境引起歌迷共鳴。回想當初由做社工時每日被工作壓得喘不過氣，有日突然腦袋空白一片就打了辭職信，「覺得我真係好鬼型」。儘管後來在樂壇載浮載沉，亦試過交完 studio 的租金戶口只剩雙位數，但他慶幸自己無放棄，「就係因為我有咁嘅選擇，而家可以有啲歌畀大家聽到。」

入行 4 年，除了唱作自己作品，亦經常以作曲、監製等身分與其他人合作，例如 MIRROR 成員 Jer、Jeremy 等，近日有報道指他大呻別人唱紅過自己唱，又引述網民指他「葡萄別人」，對此吳林峰反自嘲一句，「我第一次上報紙，係因為中肺炎，起碼第二次終於關娛樂事先啦。」他反應豁達，「我真係無唔抵得」，作為音樂人，他只想專心創作，「我自己希望，就係我嘅音樂可以畀人聽一世，作為創作人係好感恩嘅事。」

音樂源自生活

吳林峰 2023 年第一首新歌〈捱麵包的人〉，demo 來自他去年下半年開始去頻繁睇 show 的心情，當時一方面為朋友開心，另一方面為自己的路向感到迷惘，「突然間萌生一個，你好想做好多嘢，有好多慾望，好想喺音樂中表達，但未必諗到一個好啱的方向。」他記下這份迷惘，創作了一首叫〈我很想知道〉的 demo，交到詞人陳詠謙手上。

收回歌詞的一刻，由下車沿新蒲崗大有街走回studio，身邊車來車往，城市的營營役役每時每刻在眼前上演，他聆聽城市的聲音，同時回想中學以來十年音樂路，一些當時覺得難捱的時刻，都走馬燈一樣在眼前閃回，「然後我有啲認可自己，『唔，都真係有努力下』。咁啱睇到最尾一粒字，抬頭望，行到 studio 樓下，原來行咗咁耐，我都仲做緊音樂，個心突然覺得好踏實。真係無乜必要去諗，到底來緊要做啲乜嘢，仲做緊音樂，就做返音樂囉。」

他形容歌詞像一份禮物，最感動的是副歌第一句，像重拳直擊心口，「如何捱得過／想想犯過些甚麼錯／如何捱得過／要放低尊嚴／要吃飽苦楚」，他說讀到時幾乎想哭，「真係㗎喎，要點樣捱過？咪諗下自己做錯過啲咩，下次一定改到，但係下一次嘅時候，可能會放低一啲尊嚴去改。人嘅成長就係不斷放低尊嚴。同埋要吃夠一定苦楚，先至會明白做緊，係唔係自己想做嘅嘢，那就叫經歷、叫人生。」

站在新蒲崗工廈抬頭的一刻，他的迷惘好像找到了答案，「聽住個城市，反而提返我，其實我好想做嘅歌手，應該係同大家企喺同一條水平線上，只不過在用一個方法去 present ，『我叫吳林峰呀』。睇緊份歌詞，感受呢個城市，所有經歷同感受，都係因為呢個地方，音樂源自生活，係同一個mindset。」

先學做人，再學做歌

吳林峰自小喜愛音樂，中學開始在街頭玩 busking，後來修讀社工文憑時開始和朋友夾租 studio 做音樂。畢業後做過社工，工作壓力和無力感很大，有日突然坐在辦公室無意識下打了辭職信，「出到去大廈門口，腳軟坐喺地下，我先覺得『哇，我做咗啲咩』，跟住第二下係『哇，我真係好鬼型』。」

自此他選擇全職做音樂，也開始「捱麵包」之旅，試過和朋友夾租 studio，「每個人可能二千蚊左右，月頭交完，戶口剩低三十幾四十蚊，就要諗到下個月頭，點樣可以準時交到多二千蚊出來。」但為着喜愛的事努力，他不覺得「捱」是辛苦或難過，一切都只是經歷，他抱着打機的心態，過程中過五關斬六將，「捱唔捱，只不過係睇你鍾唔鍾意做呢件事。」

他記得出這首歌時，有歌迷留言「有能力先叫做『捱』，冇能力叫『承受』」，對他來說正是這樣，因為眼前的路是自己主動選擇，「因為過程係做緊我好鍾意嘅事，所以我會好記得，因為好深刻，心入面唔覺得捱係負面，反而會覺得『呢段經歷好彩我有，因為好玩』。」他又不忘講笑，「捱麵包捱到變麵包超人，咪捱麵包嘅精粹。」

〈捱麵包的人〉歌曲文案寫着，「差點兒就放棄了...幸好沒有。和麵包一樣，人會發霉。 趁新鮮吧,別浪費。 我們繼續努力。」吳林峰說，相信每個人都經歷過「差點兒就放棄」的時候，這句話就像一個給自己的擁抱，慶幸選擇繼續做喜歡的事，「唔需要特別去理會『捱』係乜嘢，總之你記住自己捱過咗；或者你仲捱緊，但你有方法捱得過，因為你而家仲喺度。」

「希望我嘅音樂可以畀人聽一世」

由街頭 busking 開始，一步步走上音樂人之路，曾多次和許廷鏗、MIRROR 等單位合作，也有自己的派台作，到去年首次在 Chill Club 獲作曲人獎，和在叱咤憑合唱歌〈我也難過的〉獲歌曲獎，吳林峰可說是新一代愈來愈受注目的音樂創作人。MIRROR柳應廷的〈迴光物語〉、〈狂人日記〉、〈離別的規矩〉，呂爵安〈小諧星〉，李駿傑〈半〉等曲都是出自他手筆，近日就有報道引述網民，形容吳林峰受訪時點評 MIRROR 成員缺點，又指他「唔抵得」別人唱他的歌紅過自己唱，「葡萄」別人比自己紅。

重提此事，吳林峰顯得無奈，強調「我係真係冇乜唔抵得佢哋，真係無。」又自嘲，起碼今次被報道，是與娛樂新聞有關，「即係，我都覺得自己係一個歌手先啦，挨邊有新聞價值，有報道好過無。」他豁達道，不會在這件事上糾結下去，「我又真係無唔開心，報道出咗，我首新歌多咗 20K views，其實都係一件好事。」

吳林峰常說「好歌有好報」，即使面對別人說他為別人寫的歌知名度更高、更受歡迎，吳林峰說，只要做到好歌，自己是幕前或幕後都無分別，「我希望我嘅音樂可以畀人聽一世，紅到首歌，喺大家心目中有個位置，對我作為創作人，其實係好感恩嘅事。呢個世代，大家都會base 於作品，認識多啲創作人，我覺得無分咁開。」

2021年旺角麥花臣舉行首個個人演唱會後，吳林峰仍在等待下一次個唱機會。問他現階段目標，他說是先學好做人，再學做音樂，「最緊要嗰樣嘢係，Be true to yourself。呢個真係我擺自己心入面一句說話來，對自己都唔誠實，無辦法令到人哋喺你首歌入面，感受到你的感覺。」