小六生「O嘴」訪問片被極速翻拍 保錡@ERROR直斥抽水行為獲網民支持

2024年升中派位喺日前（9日）放榜，唔少傳媒到油蔴地天主教小學（海泓道）進行採訪，當中有一條係關於幾位成績優異嘅小六學生接受記者提問，因佢哋嘅反應及表情而爆紅。頻道「小薯茄」及藝人黃美棋極速抽水，還原呢段O嘴訪問，不過ERROR成員保錡就喺社交網站出PO，直斥佢哋嘅抽水行為，獲得唔少網民支持。

話說喺訪問中有一名自問只係Band 2質素嘅陳學生，佢成功考入第一志願－華仁書院，佢對派位結果感到喜出望外。喺接受傳媒訪問時，佢就分享自己嘅學習心得，佢喺就讀五年級開始就每星期去補習5日，仲要一放學就即刻去補習，同時為咗提升自己，佢都參加唔同嘅課外活動。而企喺佢身後嘅兩位同學就即時作出反應，右邊嘅同學疑似喺度忍笑，而左邊嗰位同學就聽到「O晒嘴」。之後，陳學生認為自己嘅努力得到回報，而過程亦唔覺得辛苦，佢仲表示「我覺得讀書係我嘅本份」，身後兩位同學再次偷笑及露出驚訝表情。

由於該影片喺網絡爆紅，有其他藝人立即拍片還原訪問過程。不過ERROR成員保錡就喺社交網站出PO，直斥抽水行為：「成年人必須學習多思考多用點腦，努力讀書、努力做好本分，本身是一件好熱血的事，就像有些人喜歡踢足球，他也可以每天去練習為目標奮鬥。為了自己想入的中學奮鬥，應該是欣賞，應該respect。如果一班人拍片嘲諷他，小朋友會否有童年陰影？他會否覺得自己這樣說是錯嗎？會否以後不敢把心裏面的說話說出來？多點思考自己對社會的行為，不要只顧著流量而做成一個大錯，共勉之。」

呢個PO一出，唔少網民都留言表示認同保錡，例如「多謝你肯發聲，我個心都唔舒服，覺得係bully緊個細路咁」、「終於有人肯講，笑足一日， 有個小朋友有心理陰影 依家欺凌 咁嚴重真係好擔心佢。」、「小朋友好純真可愛，不過真係唔應該拍片笑佢哋」、「保琦你講得好啱，好同意，人地細路鍾意讀書，勤力學習有咩問題，講佢啲人自己一事無成有咩資格話人地勤力讀書？！」、「整件事唔應該一班人拍片嘲笑班小學生，太過份啦」、「同意，放小朋友一馬，比多啲正向鼓勵」、「講得非常好」、「完全同意, 保錡你把我心裡的擔心說了出來 Respect! 希望果D拍片抽水嘅可以盡快刪除及對小朋友道歉.」、「謝謝你！ 願意發聲 提醒」、「終於有人講」及「Respect 大佬，我哋而家係全香港人bully緊佢哋，其實大家真係睇完笑完就算，請勿抽水，針唔拮到肉唔知痛」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！