香港8大小籠包推介 新浦崗低調小店爆汁小籠包、特色肉骨茶小籠包

皮薄餡靚嘅小籠包試問又有邊個唔鍾意食呢～今期開飯仔搜羅咗8間有高質小籠包食嘅餐廳畀大家，傳統款同創意餡都有，總有一間啱你心水，仲唔快啲bookmark！

爆汁小籠包 手拉麵小廚

喺區內好有名氣嘅上海餐廳，老闆曾經於多間知名中菜做點心主管。佢嘅招牌小籠包以爆汁聞名，每一粒都加入豬皮凍，豬皮凍用老雞、豬皮及豬骨等熬成。一籠有五隻，一上枱已經見到每一隻都充滿湯汁，好飽滿，皮厚薄適中適，夾起一滴湯都唔會漏，一入口真係滿滿嘅肉汁呀。

懷舊上海菜館 上海榮華川菜館

始於1975年嘅家庭式經營上海菜館，裝修舊式簡單且樸素，懷舊紙皮石地板，龍鳳雙喜筷子套，同細細個見到嘅上海菜館一模一樣。小籠包即叫即蒸，每一粒都熱辣辣，雖然皮厚少少但肉汁好鮮甜。

皮薄多汁兼抵食 龍川上海料理

呢間小籠包幾高質素而且仲好抵食！$32有4隻，同樣即叫即蒸，表皮有濕潤感，夾落去唔容易穿，可以鎖住肉汁。配埋醋食肉嘅鮮甜味更突出呀。

90後開設上海小店 誠記小籠包拉麵

西環一間幾新淨企理嘅上海菜，除咗招牌小籠包仲有蟹粉小籠包呀！原味小籠包皮薄適中，入口都好多汁，蟹粉就唔算超香濃嗰隻，但都有微微蟹粉鮮味，配埋豬肉嘅鮮味又多一份層次。

脆煎灌湯小籠包 十里洋場

除咗招牌小籠包外，呢間上海菜仲有供應脆煎灌湯小籠包，小籠包先蒸後煎，然後用鐵板上枱，保證上枱時仍然熱辣辣～底部煎得好香脆，口感比起一般小籠包更豐富。

肉骨茶小籠包 龍點心

小籠包除咗原味，而家好多餐廳都有推出唔同嘅創意口味，肉骨茶小籠包你又食過未呢？呢款馬拉小籠包呈啡色，食落湯汁有淡淡嘅藥材味，加埋肉汁嘅鮮甜又幾好味喎。

擔擔小籠湯包 Dim Sum Library

呢間新派中菜嘅每款點心都好有特色，鍾意食重口味嘅朋友，擔擔小籠湯包就啱晒你！呢款點心融合咗擔擔麵同小籠包，入口濃郁帶微微辣，好惹味。

知名八色小籠包 樂天皇朝

鍾意食小籠包嘅朋友應該都對呢個八色小籠包唔陌生，包括原味、蒜香、人參、鵝肝、川味、芝士、蟹粉同黑松露，每款各有特色，皮都做到好薄，最重要係啱晒一次過想食唔同口味嘅朋友。

文: Yanica