小編去旅行 - 北海道上篇@Hoshino Resorts Risonare Tomamu (活動+美食篇)
今次 #小編去旅行 目的地係有雪雪雪嘅地方 - 北海道!要知道直航去嘅價錢真係好貴,作為小編去旅行都要以經濟為主,唔平唔坐架!所以今次就選擇坐樂桃航空Peach 經大阪轉機去!搭零晨機嘅好處就梗係可以一收工就即刻出發去機場,咁先可以玩盡每分每秒架!
樂桃航空嘅零晨班次MM068,係01:15起飛。大家要記得樂桃航空嘅check in 位置係機場T2,同埋好容易就會記得Peach=P段啦!
小編大概係22:45已經去到T2準備check in 程序,一去到已經見到人山人海,證明大家都好鍾意坐零晨機去玩。
Check in 程序非常快捷,而且係T2離境相對上無T1個面咁多人!
之後只需要乘搭無人列車去番T1閘口登機就得啦。
轉眼間已經上左機準備起飛,空姐亦準備示範逃生安全指示。
經過一輪入境程序後,出到黎就見到機場職員將行李跟顏色分類!呢個就係日本人服務嘅貼心之處。
拎完行李後就出到T2大堂,呢到係樂桃航空嘅專用航廈,分別有國際同國內線。因為轉機時間仲有幾個鐘,我地就去搭免費shuttle bus 到T1食個早餐先!
小編已經好肚餓喇!去松屋食個早餐先,我唔客氣喇!
之後趁仲有時間等轉機,就係T1周圍閒逛下,呢個有個KIX Airport Lounge,可以俾大家休息下沖個涼。
差唔多夠鐘就去番T2 check in轉機去札幌!樂桃航空嘅國內同國際線都係使用自助登機,只要掃瞄訂單上條碼或輸入訂單編號,就可以拎到boarding pass,非常方便。
呢到就係國內線等轉機位置喇!
仲有Peach商店俾大家買下手信架!
內陸機除咗可以轉機去札幌外,仲有福岡、東京及沖繩等。
落機後我地就去左搵接駁巴士出發去今次入住嘅酒店 - 星野集團旗下嘅Hoshino Resorts Risonare Tomamu (想知更多酒店住宿同設施可以睇下篇),記得要預先上網預約呢個接駁巴士服務,雖然要收費但非常方便。
我地就係3號候車處等上車啦!
大約2小時車程終於到達酒店,Risonare Tomamu分別有兩座大樓,而小編今次入住Tower North個座,俾個平面圖大家參考下先。
跟住小編就上房間休息先再去食晚餐。一入去見到房型真係好大好正!
枱面仲有酒店贈送嘅餅乾同毛巾。
休息一陣後,就出發去森林餐廳Restaurant Nininupri of forest 食dinner buffet。
食物種類多元化,材料都好新鮮美味。
估唔到仲有章魚丸食添!
更有師傅即場炸天婦羅,非常鬆脆好食。晚餐後就回房間休息準備第2日嘅滑雪行程啦!
第二日食完早餐後,慢慢行約15分鐘去到隔離另一座The Tower 酒店。
The Tower 都係屬於星野集團旗下嘅酒店之一,如果大家想滑雪就要黎呢邊嘅滑雪場呀!
酒店提供滑雪服裝同埋器材嘅租借服務,大人小朋友size 都齊全。
俾個價錢表大家參考下,可以選擇只租借服裝或器材。
噓~其實小編係零經驗架!好彩有得預約教練指導基本技巧,而且教練仲係香港人添!
中午有太陽天氣又唔凍,滑左一陣已經出哂汗喇!
之後搭上山纜車去挑戰下先!不過玩左幾round 已經投降放棄啦,因為連跣兩次屁股好痛!
第一次玩都算唔錯丫!(自我安慰中…T^T)
運動完梗係要補充體力啦!午餐去左試下呢個湯咖哩先。
仲有呢個呢個烤芝士真係好邪惡呀…一啖芝士入口。
當晚嘅晚餐小編仲去左hal 食dinner buffet,呢一間餐廳同尋晚嘅森林餐廳都係Tomamu 酒店自家品牌打理架。
餐廳更以"海鮮"作為是晚主題美食。
小編一直望住師傅將魚生切片同埋精美嘅擺盤,未食已經流哂口水!魚生刺身的確非常鮮甜,宜家諗番都想再食呀!
其實渡假村嘅設施梗係唔止咁少,Tomamu 仲有個GAO 戶外活動中心,分別超過20種活動,冬天嘅戶外活動包括滑雪、雪地摩托車、香蕉船、自己親手製作年輪蛋糕bamukuhen、繩索攀樹等等,不過以上冬季嘅活動係岩岩4月頭已完結。宜家開始直至夏天完結前,場地就會變成高爾夫球場、仲有網球場,或者可以租借單車、魚竿釣魚,仲可以玩水上漂筏同獨木舟等!所以全年都有好多活動可以選擇,咁多元化大人小朋友都一定鍾意玩架!就等小編再介紹渡假村其他餐廳同埋活動俾大家啦!
黎到行程第3日,因為今日要做好多運動,所以一朝早先去32樓Hokkaido sea market 食早餐先。
係呀你無睇錯!小編食Shabu Shabu做早餐,唔講仲以為食緊晚餐咁豐富呀!
餐廳仲可以望住The Tower 同埋滑雪場整個雪景。
食完早餐後就乘搭渡假村內免費shuttle bus 去GAO戶外活動中心。
著上呢對俗稱「大腳八」嘅雪鞋,係雪上可以輕鬆步行,大家出發去整年輪蛋糕先…gogogo!
一整片雪地真係好靚,真係好想係上面滾來滾去。哈哈!
去到雪地中有個帳篷,就係整年輪蛋糕嘅地方啦。
帳篷內中間有一座火爐,在場有職員即場指導製作蛋糕。製作過程就係將竹枝包著錫紙,再係上面一層一層倒上麵粉糊。要不停轉動竹枝令麵粉糊變金黃色。
登登…呢個就係完成品啦!
切開睇下個橫切面先,味道都唔錯,但感覺似食緊年輪曲奇咁脆卜卜。哈哈!
之後大家一齊去左GAO 戶外活動中心旁邊嘅Green Kitchen 食午餐。
分別order 咗沙律,蟹意粉同埋甜品同埋朋友一齊share食。
食完午餐同埋休息夠後,我地就準備好去挑戰繩索攀樹,今次有尼泊爾籍教練指導我地一班初學者技巧。
佢好細心幫大家檢查好裝備架!
嗱..有圖有真相,小編真係有落力去攀樹!不過身後嘅教練已經無視我一支箭攀左上去啦!(結果攀完係..手腳都軟哂T^T)
之後就梗係玩埋雪地摩托車同埋香蕉船啦。
勞動完後梗係要去食晚餐啦,今晚就去左呢間海鮮居酒屋試下先。
呢個刺身船真係好新鮮。
仲有個牛肉鍋都好好食。食完呢個晚餐後就要回房間休息執拾行李準備明天離開啦!
睇完今篇係咪覺得節目好豐富呢?相信以上活動大人小朋友都一定岩玩架!下一篇小編將會繼續介紹其他設施,想知更多梗係要留意#小編去旅行 - 北海道下篇@Hoshino Resorts Risonare Tomamu (酒店住宿+設施篇) 喇!或者想知更多酒店同套票優惠?可以上番官網同埋香港特約旅行社PAM holiday睇詳細資料架!
Hoshino Resorts Risonare Tomamu官網:http://www.snowtomamu.jp
香港特約旅行社PAM holiday:http://www.pamholidays.com