【小鬼猝逝】黃鴻升前女友楊丞琳回應︰沒法形容有多痛 小鬼現任女友錄影中聞噩耗離場

台灣藝人黃鴻升（小鬼）今日驚傳喺家中逝世，終年36歲。報導引述台灣警方初步調查指出，今朝11點幾接獲家屬報案，隨即派員去到小鬼北投嘅寓所，發現佢倒臥喺浴室外，面部向下而口鼻有少量出血，身體僵硬，估計已死去一段時間。

小鬼死訊傳出後，不少藝人紛紛感到突然。與小鬼曾經交往，分手後關係昇華成為家人一樣嘅楊丞琳，透過經理人回應︰

我沒有辦法形容我有多痛。鴻升對我來說就像家人般的存在，知道這個消息我真的沒有辦法接受。他的好，我永遠都會記得，也請大家記住他努力、認真、有才華的樣子。我會永遠想念他...」。

有傳小鬼現任女友係職業棒球隊啦啦隊成員峮峮，據知當時峮峮正在參與錄影，佢嘅經理人將消息轉達之後，峮峮急忙中斷錄影，並立即離開電視台。根據《中國時報》報導，峮峮經理人表示無辦法代為回答，相信小鬼嘅朋友同親人都非常難過，正在了解狀況中。

同小鬼喺節目《綜藝玩很大》拍擋嘅KID（林柏昇）得知噩耗十分震驚，由經理人代為回應時表示KID非常崩潰，正在趕返台北，希望各方俾佢一啲時間。而KID事後喺IG發文寫道：不要問我任何事，拜託了大家。

有記者致電另一位《綜藝玩很大》拍擋吳宗憲時，聽到憲哥正在哭泣。而憲哥亦都趕返台北了解事情。

同小鬼係舊同學嘅女演員許瑋甯，收到死訊之後喺社交媒體寫道：明天是我們約好的同學聚會，原本你說要工作，我們會照常舉行，為你留一個位置，因為明天不用工作，你可以來參加了⋯⋯

至於曾經一齊主持《娛樂百分百》、傳聞交情不再嘅羅志祥，喺IG上發出全黑圖片，上面寫住：「怎麼會這樣」。同樣主持《娛樂百分百》，因為捲入羅志祥桃色風波而潛水嘅愷樂，都因為呢件事而喺IG 出post，寫住「無法接受」。