年年陪跑 究竟係咩心情？

每年大台頒獎禮，除咗得獎者受到注目之外，經常陪跑嘅藝人同樣備受關注，而馬國明當然係陪跑藝人嘅佼佼者啦！馬明係2012年萬千星輝頒獎典禮嘅大熱之一，點知最後視帝歸黎耀祥，當下馬明更反應唔切，全程O嘴，成為一時佳話。其實馬明由2003年開始，每一年都有提名，但十三年以來，只係拎過兩次獎，分別係2006年嘅「飛躍進步男藝員」同埋2012年嘅「我最喜愛的電視男角色」，真係聞者傷心！到今年，馬明照樣獲提名視帝，但照樣同獎項擦身而過，不過原來頒獎禮前，佢已經估到自己再次陪跑，仲話拍喜劇係比較難攞獎。嗚～聽到都覺得好酸啊！

除左馬國明呢個長期陪跑好手之外，其實大台仲有好多遺珠都未有機會踏上台攞獎。

王浩信

今年視帝大熱之一嘅王浩信，因為《EU超時任務》入面渠頭一角，演技備受觀眾肯定，可惜最後只獲得本年新設獎項「最受歡迎劇集搭檔」獎，令網民大感不滿，仲話這個只係豬肉獎！王浩信入行近十年，喺2012年《名媛望族》一劇入面因為被劉松仁連摑14巴而成名，後來又喺《法外風雲》被謝雪心狠摑23巴，終奪飛躍進步男藝員，實力受到肯定！佢近兩年更開始擔正做男主角，表現一直都唔錯，可惜一直都只係提名，但同獎項無緣。雖然佢得唔到獎，但見到一班觀眾為自己抱不平，都已經相當感動啦！

蕭正楠

蕭正楠早在2003年已經為TVB拍劇，但拍完一套劇就離巢轉戰內地市場。後來2008年回巢後，開始穩定拍劇，更喺2012年憑著《當旺爸爸》提名男配角，自此表演一直平穩，仲分別年年提名男配角同男主角。雖然蕭正楠近年不斷擔正，仲因為同翠如BB嘅甜蜜戀情而人氣上升，但係依然撇唔甩陪跑命，近四年嘅頒獎禮都坐定定冇份上台 。不過唔少網民都覺得佢仲未夠班拎視帝，睇嚟蕭正楠要攞獎，都仲要磨下啲演技啊！

李施嬅

因為選美入行嘅李施嬅，由2004年開始已經拍劇，無論古裝、時裝，每年都有穩定嘅產量。經常飾演刁蠻潑辣角色嘅李施嬅，因為《宮心計》、《公主嫁到》等一系列宮廷劇而跑出，演技開始受到賞識，之後仲開始擔正《樓奴》同埋《純熟意外》，可惜劇集迴響唔大。其實佢由2005年開始已經屢獲提名最佳女配角同女主角，但足足11年都止於提名，並未有如願以償。眼見身邊同樣入行多年嘅女藝人都相繼捧獎，相信佢都好想加把勁，再次向獎項衝刺！

圖片來源：馬國明@Facebook、馬國明官方國際影迷會@weibo、王浩信@Facebook、蕭正楠@Facebook、李施嬅@Facebook、Tvb.com