廖碧兒前男友盧啟賢被《福布斯》調查指學歷及資產疑誇大

被譽為鑽石級筍盤嘅富二代盧啟賢（Calvin Lo），佢經常接受不同地區嘅傳媒訪問，不過最為人熟悉嘅都係廖碧兒前男友呢個身份。最近佢被美國《福布斯》調查報道指佢喺學歷及資產上好多嘢都係誇大及造假。

《福布斯》嘅調查報道指，喺好多世界國地嘅專訪及報導中，盧啟賢被形容係「全球最大人壽保險經紀商」亞溢利國際（RE Lee International）嘅CEO兼擁有者、資產管理公司RE Lee Capital嘅創始人、曾接受哈佛大學教育嘅投資者、喺2018年透過私人投資公司斥資12億美元購入台北文華東方酒店、亞洲最大香檳投資者和收藏家及威廉斯一級方程式賽車隊嘅投資者等等。不過Calvin就被《福布斯》指以上嘅描述的大部分都無法證實。

喺學歷方面，盧啟賢被證實1999年喺加拿大皇后大學（Queen's University）畢業，不過就無法證實佢讀過哈佛商學院，因為《福布斯》引述哈佛大學指哈佛商學院嘅學位持有者係冇Calvin Lo呢個名，而哈佛商學院嘅高管教育項目就表示冇盧啟賢授權，所以唔可以查詢其數據庫。

至於身家方面，盧啟賢擁有保險業務亞溢利國際，不過《福布斯》引述一名前高層估計呢個公司代理嘅保單冇可能超過8億美元。而《福布斯》就估計呢間公司嘅價值大約6千萬。去到物業方面，盧母李佩珍及盧父Francis Lo喺山頂擁有至少兩套公寓，再加上中環亞溢利國際辦公室（面積4,045平方呎），及加拿大溫哥華一套公寓，盧啟賢與父母嘅身家總值未夠兩億美元，《福布斯》就表示雖然佢哋好有錢，不過就唔係Calvin講到咁有錢。

咁佢有冇收購台北文華東方酒店？《福布斯》引述該酒店嘅所有者開泰豐國際發言人，佢就話喺2019年曾經同盧啟賢討論過，不過出售事宜就未有通過。

盧啟賢被指係亞洲最大香檳投資者和收藏家，不過《福布斯》引述拍賣行Christie’s指從未見過有香檳超過2.5億美元。另外，關於威廉斯一級方程式賽車隊，《福布斯》引述車隊内部一位消息人士指冇人知道邊個係盧啟賢，佢亦從來都唔係車隊嘅投資者。

《福布斯》有就此向盧啟賢及其母查詢，不過盧啟賢透過律師發函回應，話關於所有不誠實、不真實或不道德指控，佢均作出強烈否認，並希望被排除係《福布斯》公佈嘅財富排行榜及表示唔希望《福布斯》對佢進行報道。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！