張敬軒43歲牛一自爆日瞓兩個鐘 黃偉文公開對方10年前夢想

【on.cc東網專訊】歌手張敬軒尋日（1日）43歲生日，佢開心上載多張生日蛋糕及收花收禮相，幾咁開心，淨係花都好幾紮，更自爆原本由收「辣跑」變「迷你車」，講緊嘅係佢個汽車造型大蛋糕，佢留言：「一口氣吹43支生日蠟燭，原來都幾辛苦，因為啲蠟燭基本吹唔熄🤣充滿愛嘅一個生日，多謝呢幾日送上祝福嘅各位至愛親朋、家人仲有各位愛錫我嘅朋友❤️雖然呢兩日忙到得兩三個鐘頭瞓，可以話係最忙嘅一個生日，不過相信所有成果都會值得！多謝我身邊所有一齊戰鬥嘅戰友同家人❤️ 大家2024都一定會好好㗎！😘」

好友黃偉文（Wyman）亦上載昔日與軒仔合照送祝福：「2014年，『青春常駐』面世嗰年，依家睇番，究竟係『常駐』定『告別式』？（唔係tasting menu，唔使一個係咁就全枱都係咁，所以，你哋揀嗰陣，可以一個揀『常駐』一個揀『告別式』㗎！哈哈哈！）張生，生日快樂，你私底下同我講嘅各種『夢想』，希望全部成真，若果唔介意在下只得綿力，我幫得幾多得幾多。」除了獲得Wyman的愛，一班身處美國的歌迷，更集資購入紐約時代廣場LED屏幕廣告時段，於當地時間2月1日晚上8時播放軒仔的生日應援影片。

【更多影劇新聞詳情請上東網新聞】