張景淳北上賣魚蛋疑為轉行鋪路 與羅天宇李興華合資計劃連鎖式經營

張景淳（Stanley）憑TVB處境劇《愛·回家之開心速遞》龔燁一角入屋，與「熊若水」呂慧儀組成CP大受歡迎，不過去年有傳張景淳因慣性遲大到遭雪藏。有指呂慧儀幫口向高層求情先至令張景淳成功解凍，但曝光率始終大不如前，就連宣傳活動都無份出席，監製林建祥就解話指活動撞正張景淳要開工或有私人事處理先嚟唔到。日前，張景淳就與羅天宇、李興華北上合資搞飲食生意疑似為轉行鋪路；三人更喺五一黃金周時到深圳南山區藝術節嘉年華擺檔賣小食，唔少粉絲舉牌為張景淳撐場。

張景淳自稱張店長親力親為布置檔攤，更加親手炮製魚蛋；三人嘅號召力相當強勁，第一日開檔就因食材不足而提早收檔，即使翌日將食材份量加碼，但仍供不應求。張景淳表示早於加入TVB時品嚐過李興華爸爸手藝，當時已想跟對方學師，直到近年李興華與家人移居內地及經營家庭式小食店，張景淳決心投資，與羅天宇及李興華合力經營，現時除咗光明區本店，仲有兩間分店喺福田，佢哋仲計劃將生意做到連鎖式經營。不過，張景淳就話唔會放棄幕前工作，近月都係中港兩邊跑，夜晚一收廠就去深圳，翌日再返港開廠，攰得嚟但開心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！