張景淳驚喜現身呂慧儀教育中心開幕日 同日趕住北上出席自己小食店開幕儀式

張景淳與呂慧儀於TVB處境劇《愛．回家之開心速遞》以「龔水CP」成功入屋，更因而傳出緋聞。繼張景淳榮升老闆，與羅天宇、李興華北上合資搞內地小食店飲食生意「OH LIKE噢萊客」，呂慧儀日前亦投資6位數創辦教育中心，前日（16日）於荃灣中午12時舉行開幕禮，除咗獲《愛．回家》一班屋企人及同事撐場，連原先唔喺嘉賓名單上嘅張景淳都驚喜現身。原來當日亦係張景淳內地小食店第五間分店嘅開幕日，祝賀完呂慧儀後佢就趕住北上出席下午3時舉行嘅龍華紅山旗艦店開幕儀式。

張景淳、羅天宇及李興華為旗艦店剪綵，許家傑、陳庭欣、麥長青、JW王灝兒、翟威廉、林秀怡、周志康、陳懿德、葉靖雯、阮嘉敏等多位好友亦有現身支持，仲化身小粉絲興奮尖叫。羅天宇喺台上致辭時感謝拍檔李興華付出，表示對方工作量倍多，每日都要回覆大量訊息及處理生意上嘅大小事務，令李興華感動到眼濕濕。另外，羅天宇及張景淳都係中港兩邊跑，藉工作有空檔時就會北上開會或坐鎮小食店，佢哋曾經喺五一黃金周時到深圳南山區藝術節嘉年華擺檔，當時張景淳更自稱張店長，親力親為布置檔口及親手炮製魚蛋，號召力相當強勁，第一日開檔就因食材不足而提早收檔，即使翌日將食材份量加碼，但仍供不應求。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！