張致恒被暗嘲小食店打工兜踎 吳浩康挺身而出反擊：我好想知樓主搵緊幾多錢

張致恒（Steven）近年負面新聞不斷，除咗公開承認自己患上性上癮，與老婆區燕雯（雯雯）嘅花邊新聞亦一籮籮，形象插晒水。雯雯多次公開批評張致恒「又廢又懶」，生活狀況窮到連三個仔女嘅生活費都好緊拙，雖然曾暗示要展開新生活，但每次都無真係分開，被冠以「離婚KOL」之名。近日，雯雯更自爆懷上第四胎；對於老婆經常公開批評，張致恒表示會尊重對方選擇，自己仍深愛太太；而佢而家就有份小食店固定工作，一星期返4日工。

有網民就影到張致恒打工嘅情況，上載照片並留言，暗嘲佢落泊兜踎：「啱啱喺重慶撞到張致恒估唔到，佢去到咁遠搵食，唔知道間舖頭係佢開定係慘到要返大陸打呢啲xx工？紋身match咗，都肯x定係佢。」唔少網民都留言指覺得張致恒自力更生無咩問題，張致恒前同事吳浩康就用真身AC留言力撐：「我好想知樓主係做咩職業？搵緊幾多錢？職業無分貴賤，xx工？你攞你自己份工出嚟講吓先啦！」，再回應指：「我知佢好差，但佢係我朋友。」，吳浩康挺身而出呢個行為獲網民大讚有義氣：「成間英皇舊同事，得你敢用自己account為你依位唔爭氣既朋友出事，真男人」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！