微辣前成員Rosalina見面會收費每位980元被轟爆貴 出PO回應與古天樂比較：自己絕對值

YouTube頻道《微辣Manner》前經理人阿晶於去年7月因患上抑鬱症及疑被欺凌輕生，微辣頻道自此暫停更新，直至本月初發布由六毫子作詞嘅歌曲《成長列車》，旗下藝人亦陸續露面。前成員李熙媛Rosalina日前宣布將於9月21日於香港舉辦見面會，不過其門票定價就被網民直斥爆貴。

Rosalina見面會《This is R首次線下見面會！（aka Share with R）》報名表格上標明要跑出網絡世界，將能量及熱情帶畀同頻嘅人；見面會將於九龍舉行，全程4小時，費用每位980元。不久，Rosalina發布IG限時動態，表示收到好多DM話覺得好貴，不過佢就覺得係每個人評估價值嘅問題，又以古天樂開見面會作比較：「最後，都講檬邏輯性既野。我知有好多人Dm，覺得好貴。其實呢個就係每個人，自己評估價值既問題。係我角度，我會想像古天樂開見會面，我時間啱價錢啱，我就會比錢去見佢（我拎自己同古天樂比？yes! Why not，但又係人，我又係人；任何明星喺我眼中都係一個人only），價錢亦代表呢個人係你心目中嘅價值，所以我標價越高，我搵到既同頻越一致。因為係你心目中，我值得。」Rosalina續指其實都係需求同供給問題：「你有需要，你就買；覺得唔啱價，就唔好買」，又指覺得自己絕對值呢個價格，仲只會越黎越貴：「因為我每日都進步緊，我每日都係更好既自己，我既時間同能量好寶貴，我會留返比值得既人」。

一班網民批評Rosalina過份自信，更加指980元其實可以睇到更紅嘅歌手演唱會：「以為佢想引關注起話題先特登開價980」、「你直接講話擺明搵fans笨咪仲好」、「我去日本睇宇多田光演唱會都只係收930HKD」、「仲有濱崎步同倖田來未演唱會都只係700hkd，人地天后開價都平過佢」、「無錯，古天樂同佢都係人，但係佢錯誤地覺得自己價值高，而實際佢既價值可能係300？」、「學佢咁講，大家都係人，做咩要見你」、「我都係人，喺見面會決定收返佢980」等等。另外，又有網民PO出日本AV女優河北彩伽6月份香港粉絲見面會嘅門票價格，指最平門票都係880港元：「無比較真係無傷害」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！