《忘記和記》效應 你忘記唔到嘅和記x黎明廣告(上)

19+

 

Juno嘅新歌《忘記和記》,本來一聽就知係向90年代一系列和記電訊廣告致敬。

正當覺得首歌得2分幾鐘唔夠喉之際,

隔個禮拜就派咗個完全版,仲要有埋真.黎明合唱!

 

聽得多,當堂好掛住歷來嘅和記廣告,就算而家睇都仲覺得勁……

勁多budget呀喂!

 

第一代-阿May的誕生

主題歌︰《夏日傾情》

金句︰「May?你點呀」

故事︰好簡單,Leon歌迷May整親腳,睇唔到演唱會。

朋友於是遞部電話俾Leon同阿May講,小fans得到一句慰問。

正正因為女主角叫May,之後差不多每一位廣告女主角都係叫May。

亦令到一時間全港英文名係May嘅少女人數激增。

 

順帶一題,廣告入面嘅「天地線」係一部喺指定地點先可以打、

只可打出冇得打入嘅無線電話(簡稱CT2),最大用途係配合call機使用,隨時覆call。

當年好多人真係要周街搵電話上call台聽口訊架。

 

第二代-天地情緣

主題歌︰《那有一天不想你》

金句︰有緣嘅,我地會再見

故事︰開始玩認真,十足而家嘅微電影。

Leon喺極權國家揭發咗領導人秘辛,於是佢同阿May(童愛玲飾)要逃亡,但係Leon自己留低,

飽受酷刑逼害。一段日子後,May 留言俾Leon,Leon個call機就喺身邊響起……

細個睇覺得好浪漫淒美,「而家諗返……

點解Leon唔跟埋上架直升機?點解天地線喺第度都用得?

Anyway廣告入面個call機訊息「危險速逃」,都算係當年潮語,

例如隔離班搜書包,就會有人走過嚟講低呢4個字……

 

第三代-特工Leon

主題歌︰《一生最愛就是你》

金句︰有緣嘅,我地實會見到面

故事︰承接上次嘅電影感+災難感,今次Leon係特種部隊成員,

要帶隊偵破恐怖襲擊。

呢一代由阿May、主題曲以至故事,都有種珠玉在前嘅感覺。

但係睇得出駛咗更多嘅錢,故事有幾犯駁就無謂講啦。

 

第四代-親情

主題歌︰《情深說話未曾講》

金句︰喂?阿媽?我冇嘢呀

故事︰唔再扮特務同革命分子,貼返手機嘅真正用途-溝通。

Leon出國生活,就算同屋企人幾多唔妥,都總會掛住兩老。

喺餐廳見到第個老人家垂垂老矣,於是想打返屋企……

 

呢條片喺紐約取景,同一年Leon拍咗《甜蜜蜜》,

2個故事好似遙遙呼應咁。

可能拍咗幾年都要有個阿May而唔係阿媽,講愛情好睇過講親情,

同一年用同一首歌,拍咗個唔相關嘅短版本

有少少夾硬咁拍咗另一個都市愛情小故事。

第五代-Bungy Jump

主題歌︰《只要為我愛一天》

金句︰要贏人,先要贏自己

故事︰Leon嘅籃球隊友馮德倫生性躁底,打波講手,對家撩佢去跳Bungy Jump又真係跟。

好在馮德倫家姐男友Leon跳先一步,攞晒彩。

呢一代唔再搵新面孔做阿May,索性搵楊采妮上陣,

佢地之間嘅第三者(細佬)係同雷頌德夾Band嘅馮德倫。

而《忘記和記》首歌嘅神緒最似《只要為我愛一天》。

至於點解可以喺青馬大橋跳Bungy Jump呢,就唔深究啦。

 

第六代-任性女友

主題歌︰《愛你不愛你》/《我這樣愛你》

金句︰乜你緊張我咩?/我係咪好任性?係,不過係我揀嘅

故事︰Leon轉唱片公司,唔知係咪想壯吓聲勢谷晒2首歌,

所以故事分上下集。

上集同任性女友有好多分歧,搞到同人大打出手。

下集兩個人上山滑雪女友出意外,Leon捨命相救,睇到fans冧冧豬。

 

如果嗰時有港女呢個term,咁Lee Ann飾演嘅阿May真係當之無愧。

不過個人認為佢係歷代最靚阿May,險勝童愛玲同Charlie。

而廣告出街之後亦入行拍過幾套戲,但係好快就退出娛圈讀大學,

早幾年返過香港出席活動。

你可能還想看