患遺傳病曾萌生輕生念頭 傳陳鍵鋒有意退出娛圈傳教

曾經係無綫力捧小生之一嘅陳鍵鋒，參與過唔少人氣劇集拍攝，例如《律政新人王》系列、《少年四大名捕》及《學警》系列等等，令人留下深刻印象。當年更憑住俊俏外表、身材高大風靡萬千少女嘅心，更被封為「少女殺手」，不過之後工作量一直減少。陳鍵鋒喺2010年約滿後選擇離開無綫，轉戰內地市場。佢喺內地拍過唔少大熱劇集，仲獲得唔錯成績。

現年42歲嘅陳鍵鋒多年嚟都忙個不停，前年喺泰國做身體檢查時，意外發現個腦少咗條主要血管。之後，佢亦返香港搵專科診斷，證實佢患咗一種沒辦法根治嘅遺傳病。當時佢受到好大打擊，成日諗埋啲負面嘢，搞到佢有輕生念頭。

由細到大都係基督家庭成長嘅陳鍵鋒，喺最徬徨迷失時得到屋企人鼓勵，令佢重新審視自己嘅人生。有報道指佢報讀一個為期四年嘅美國芝加哥遙距神學學士課程，並打算再進修碩士課程，完成碩士課程後，有意退出娛樂圈去傳教，分享自己嘅個人及抗病經歷，幫助有需要嘅人。